सिन्धुपाल्चोक एमाले अध्यक्षका लागि पाँचजनाको उम्मेदवारी, पदाधिकारीमा क–कसले दिए ?

सिन्धुपाल्चोक । नेकपा एमाले सिन्धुपाल्चोकको अध्यक्ष पदका लागि पाँचजनाले उम्मेदवारी दिएका छन् । नवौं जिल्ला अधिवेशनअन्तरगत नेतृत्व चयनका लागि सुरु भएको चुनावी प्रक्रियमा अध्यक्षका लागि अहिलेका सचिव कमल नेपाल, नेताहरु केदार क्षेत्री, बालकृष्ण देउजा, होमनारायण श्रेष्ठ र डोल्मा तामाङले उम्मेदवारी दिएका हुन् ।

त्यस्तै दुई उपाध्यक्षका लागि चारजनाको उम्मेदवारी परेको छ । जसमा जेपी सिलवाल, मित्रलाल चौलागाइँ, उमा प्रधान र चन्द्र थिङ रहेका छन् । त्यस्तै एक सचिवका लागि आठजनाले उम्मेदवारी दिएका छन् । रामचन्द्र बस्नेत, सोमर बम्जन, विष्णुमणि आचार्य, कृष्णगोपाल तामाङ, अर्जुनकुमार भण्डारी, फइन्द्र तामाङ, यज्ञ सापकोटा र नेत्र पौडेलले सचिवका लागि उम्मेदवारी दर्ता गराएका हुन् ।

दुई उपमहासचिवका लागि नौजनाले उम्मेदवारी दिएका छन् । रामबहादुर सुनार, कुष्माखर नेपाल, निर्मल बञ्जरा, चिरन तामाङ, सुशीला पाख्रिन, राजकुमार सुवेदी, रामचन्द्र नेपाल, शिवहरी सापकोटा र डबले लामाले उपसचिवका लागि उम्मेदवारी दिएका हुन् ।

त्यस्तै सदस्यका लागि एक सय ७४ जनाको उम्मेदवारी परेको सिन्धुपाल्चोक एमालेले जनाएको छ ।

२३ गते उद्घाटन भएको सिन्धुपाल्चोक एमालेले नेतृत्व चयनका लागि आजदेखि चुनावी प्रक्रिया सुरु गरेको हो । पाँचजनाको उम्मेदवारी परे पनि सहमतिमै नेतृत्व चुन्ने प्रयास भइरहेको सिन्धुपाल्चोक एमाले इन्चार्ज शेरबहादुर तामाङले बताए ।

उम्मेदवारी दिनेहरुले भने चुनावको सामना गर्ने तर सहमतिका नाममा कसैले घोषणा गरेको नाम नस्वीकार्ने बताइरहेका छन् ।

अध्यक्षका उम्मेदवार नेपाल यसअघिका सचिव हुन् भने केदार क्षेत्री वाग्मती प्रदेश सदस्य एवम् बलेफी गाउँपालिकाका अध्यक्ष हुन् । जुगल गाउँपालिकाका अध्यक्ष श्रेष्ठ गाउँपालिका राष्ट्रिय महासंघका समेत अध्यक्ष हुन् । उनी यसअघि जिल्ला अध्यक्षमा झम्क नेपालसँग पराजित भएका थिए । बालकृष्ण देउजा भूमिहीनको पक्षमा आवाज उठाउने नेताका रुपमा परिचित छन् ।