माओवादीको स्थायी समिति बैठक जारी, पदाधिकारीमा सहमति जुटाउनेबारे छलफल

काठमाडौं। नेकपा (माओवादी केन्द्र) को स्थायी समिति बैठक महाधिवेशन स्थल प्रज्ञा भवन कमलादीमा सुरू भएको छ । माओवादीले दिउँसो १ बजे बन्द सत्र बोलाएको छ र २ बजेबाट निर्वाचन प्रक्रिया पनि सुरू हुँदैछ ।

त्यसअघि नै केन्द्रीय समिति सदस्यमा सहमति खोज्न माओवादीको स्थायी समिति बैठक सुरू भएको हो । माओवादीले ५० प्रतिशत खुला र ५० प्रतिशत सामानुपातिकबाट केन्द्रीय समिति निर्माण गर्ने बताएको छ। तर, तोकिएको क्लस्टर मिलाउन माओवादीलाई धौ-धौ परेको छ ।

बैठकमा त्यो विषय र पदाधिकारीमा सहमति जुटाउने प्रयास पनि हुने बताइएको छ । माओवादी अध्यक्ष पुष्पकमल दाहाल ‘प्रचण्ड’ ले सबैको सहमतिमै केन्द्रीय समिति र पदाधिकारी घोषणा गर्ने बताएका छन् ।