बालुवाटारमा गठबन्धन बैठक सुरू, माधव नेपाल अनुपस्थित

काठमाडौं । प्रधानमन्त्री शेरबहादुर देउवाले बोलाएको सर्वदलीय बैठकअघि सत्तारुढ गठबन्धनको बैठक बालुवाटारमा सुरु भएको छ ।

बैठक बस्न ढिलो भएपछि नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपाल बाहिरिएका छन् । बाहिरिने क्रममा नेपालले ‘अर्काे बैठकमा जान लागेको’ प्रतिक्रिया दिएका छन् ।

बैठक दिउँसो २ बजे तय गरिएको थियो । तर, ज्यापु दिवसको अवसरमा आयोजित एक कार्यक्रममा प्रधानमन्त्री देउवा सहभागी भएकाले बैठक सवा एक घण्टा बित्दासम्म सुरू भएको थिएन ।

सत्तारुढ गठबनन्धनको बैठकमा प्रधानमन्त्री शेरबहादुर देउवासहित नेकपा माओवादी केन्द्रका अध्यक्ष पुष्पकमल दाहाल, जसपा अध्यक्ष उपेन्द्र यादव लगायत सहभागी छन् ।

प्रधानमन्त्री देउवाले संसद सुचारु गर्ने लगायतका विषयमा छलफल गर्न सर्वदलीय बैठक बोलाएका हुन् । नेकपा एमालेले भने सर्वदलीय बैठकमा नजाने बताइसकेको छ ।