‘गोर्खा वारियर २’ सुटिङ सेटमा दुर्घटना : भीरबाट खसेर हिरो ‘गम्भीर’

सिन्धुली । फिल्म ‘गोर्खा वारियर २’ छायांकनको क्रममा अभिनेता रितेश चाम्स भीरबाट लडेर गम्भीर घाइते भएका छन् । उनको घाँटीमा गहिरो चोट लागेको र स्थानीय स्वास्थ्य केन्द्रमा उपचाररत रहेको निर्देशक मिलन चाम्सले जानकारी दिए ।

त्यहाँको एक भीरबाट हिरो खसेको एक्सन दृश्य छायांकन गर्नुपर्ने सिक्वेन्समा यस्तो दुर्घटना हुन पुगेको जानकारी चाम्सले दिए । ‘भिरबाट खस्नुपर्ने नै दृश्य खिच्नुपर्ने थियो तर, असन्तुलित हुँदा वास्तविक चोट लागेको छ’ निर्देशक चाम्सले भने । ‘अहिले उनलाई स्थानीय पोलिक्लिनकमा २४ घण्टे अब्जर्भेसनमा राखिएको छ’ फिल्मको सेटबाट चाम्सले जनाए

फिल्म सेटमा उक्त दुर्घटना भएपछि बुधबार दिउँसोसम्म छायांकन अवरुद्ध भएको थियो । सेटमा तनावको माहौल भएपछि रितेशको भूमिकाबाहेकका अन्य सिक्वेन्स खिच्दै छायांकन अघि बढाइएको छ ।

घाइते अभिनेता चाम्सलाई निको हुन अझै एकदेखि डेढसाता लाग्ने जनाइएको छ । फिल्मको मुख्य पात्रको भूमिकामा रितेश छन् भने फिल्ममा उनको एक्सन दृश्यहरु समावेश गरिएको छ ।

मंसिर ९ गतेदेखि सिन्धुलीदेखि सुरु भएको गोर्खा वारियर २ को ४० प्रतिशत छायांकन सकिएको छ भने दमौलीमा फिल्म सुट गर्ने तयारी छ । चाम्स इन्टरटेनमेन्ट र लन्डन सिनेआइको सहकार्यमा निर्माण हुँदै गरेको यो प्रोजेक्टले बेलायती सेनामा गोर्खालीले देखाएको वीरताको कथा प्रस्तुत गर्छ ।