धुर्मुसलाई अर्थमन्त्रीको आश्वासन- निराश नहुनू, रंगशालालाई बजेट आउँछ (भिडिओ)

चितवन । अर्थमन्त्री जनार्दन शर्माले गौतमबुद्ध अन्तर्राष्ट्रिय क्रिकेट रंगशाला निर्माणमा सक्रिय सिताराम कट्टेल ‘धुर्मुस’ लाई निराश नहुन आग्रह गरेका छन् । धुर्मुसले रंगशाला निर्माणमा बजेट अभाव भएको र १७ करोड ऋण लागेको सामाजिक सञ्जालबाट बताएका थिए ।

‘सरकार नकारात्मक छैन, बजेट बनाउने अवधिमा बजेट आउँछ, निराश नहुनू ‘, धुर्मुसलाई निराश नबनी अगाडि बढ्न आग्रह गर्दै भरतपुर विमानस्थलमा पत्रकारसँग अर्थमन्त्रीले भने, ‘रंगशाला निर्माणको अभियान चल्यो, धुर्मुस-सुन्तली फाउन्डेसनले साहसिक काम अगाडि बढाएकोमा प्रशंसा गर्न चाहन्छु ।’

कलाकारहरूले महत्वपूर्ण योजना सार्नु राज्यका लागि चुनौती भन्दै अर्थमन्त्री शर्माले रंगशाला निर्माणलाई पूर्णता दिइने दाबी गरे । २०७५ माघदेखि निर्माण सुरु भएको रंगशाला २ वर्षमा निर्माण सक्ने भनिए पनि बजेट अभावले रोकिएको छ ।

भरतपुर-१६ स्थित रामपुर क्याम्पसको २० विघा ६ कट्ठामा रंगशाला निर्माणाधीन छ । जनस्तरबाट करिब ३ अर्ब ५५ करोड संकलन गर्ने गरी रंगशाला निर्माणको घोषणा गरिएको थियो ।