प्रदेश २ का सबै जिल्लामा माओवादीले तोक्यो संयोजक (सूचीसहित)

जनकपुरधाम । नेकपा माओवादी केन्द्रले प्रदेश २ का आठै जिल्लामा जिल्ला समन्वय समितिका संयोजक तोकेको छ ।

अध्यक्ष पुष्पकमल दाहाल ‘प्रचण्ड’ को उपस्थितिमा काठमाडौंमा बसेको प्रदेश पदाधिकारीको बैठकले सप्तरीमा उमेशकुमार यादव, धनुषामा दीपक यादव, महोत्तरीमा तुलसी ढुंगाना, सिरहामा रामकुमार यादव, सर्लाहीमा कमल बुढाथोकी, रौतहटमा देवेन्द्र पटेल, बारामा अनिल श्रेष्ठ र पर्सामा रामदरेश कुशवाहालाई संयोजक तोकेको हो ।

सप्तरी र सिरहाका संयोजक यादवद्वय पूर्वमन्त्री हुन् । सिरहा संयोजक बनेका यादव अहिले प्रदेश संसद पनि छन् ।

प्रदेश २ को एकमात्र महानगरपालिका वीरगञ्जको संयोजकमा रहबर अन्सारीलाई बनाउने निर्णय गरिएको छ । सर्लाहीको सह-इन्चार्ज लोचन धिमाल र रामपृत राय एवं धनुषाका सह-इन्चार्ज झल्कु यादवलाई दिएको छ । अन्य जिल्लामा भने सह-इन्चार्ज तोक्न बाँकी छ ।

बैठकले पार्टीको प्रदेश २ सल्लाहकार र ज्येष्ठ कम्युनिष्ट मञ्च, प्रदेश विभाग, जनवर्गीय संगठन र मोर्चा संगठनहरू यथाशीघ्र गठन गर्ने निर्णय पनि भएको माओवादी प्रदेश २ का अध्यक्ष प्रल्हाद बुढाथोकी र सचिव जोगकुमार बरबरियाले संयुक्त विज्ञप्तिमार्फत जनाएका छन् ।