मिस युनिभर्स नेपालको ग्रान्ड फिनाली आज : १६ सुन्दरी उपाधिलाई भिड्दै

काठमाडौं । मिस युनिभर्स नेपालको ग्रान्ड फिनाली आज बेलुका राजधानीको याक एन्ड यति होटलमा आयोजना हुँदैछ । मिस वर्ल्डपछि प्रतिष्ठित मानिने यो पेजेन्टमा १६ जना सुन्दरीले प्रतिस्पर्धा गर्दैछन् ।

सेमिफाइनलिस्टमध्येबाट एक जना प्रतिस्पर्धीले ताज पहिरिनेछिन् । दर्शकको मतदान र निर्णायकको मतको आधारमा विजेता तथा उपविजेता छानिने जनाइएको छ ।

शीर्ष-१६ मा सुजिता बस्नेत, निनाकान्त मण्डल, रक्षा उप्रेती, मन्दिरा कार्की, वृष्टि आचार्य, प्रीतिमा पन्थी, केशु खड्का, सगारिका मल्ल, स्मिता न्यौपाने, सगुन गुरुङ, सदिक्षा खड्का, प्रतिक्षा महरा, स्मारिका कार्की, विभूति गौतम, आर्या निशान्त र अनिशा महर्जन छन् ।

यसपटक ६ वटा जज छन् । जसमा पूर्वमिस इन्डिया ऋतुसिंह वैद्य, मेकअप आर्टिस्ट स्नेह राणा, गायिका इन्दिरा जोशी, पत्रकार सरिताश्री ज्ञवाली, पूर्वमिस नेपाल इशानी श्रेष्ठ र कर्पोरेट ट्रेनर मानसी अग्रवाल छन् ।

मिस युनिभर्स नेपालकी निर्देशक नग्मा श्रेष्ठले ग्रान्ड फिनालीको तयारी पुरा भएको बताइन् । स्वीडेनको कस्मेटिक कम्पनी ओरीफ्लेम यसपटकको मिस युनिभर्सको टाइटल स्पोन्सर हो ।

विजेताले आगामी डिसेम्बरमा इजरायलमा हुने मिस युनिभर्समा नेपालको प्रतिनिधित्व गर्नेछिन् ।