साफ च्याम्पियनसिप: श्रीलंका र नेपालबीचको खेल एक्सन स्पोर्ट्सले लाइभ दिने

काठमाडौं । साफ च्याम्पियनसिप अन्तर्गत केही बेरमा सुरु हुने श्रीलंकाविरुद्धको खेल एक्सन स्पोर्ट्स टेलिभिजनले प्रत्यक्ष प्रशारण गर्ने भएको छ ।

प्रतियोगिता सुरु हुनुअघि अखिल नेपाल फुटबल संघ (एन्फा)ले ४० लाख रूपैयाँमा प्रत्यक्ष प्रशारणका लागि टेन्डर खोलेको थियो । तर, कसैले बिड नगरेपछि शुक्रबार भएको माल्दिभ्सविरुद्धको खेल नेपालमा भएका दर्शकले हेर्न पाएका थिएनन् ।

त्यो खेलमा नेपालले आयोजक तथा साविक विजेता माल्दिभ्सलाई १-० गोलको नतिजामा पराजित गरेको थियो । आज हुने श्रीलंकाविरुद्धको खेल ९:४५ बजे सुरु हुनेछ ।

र, यो खेल प्रत्यक्ष प्रशारण हुने एन्फाले जानकारी दिएको छ । यो खेलका लागि  नेपालका मुख्य प्रशिक्षक अब्दुल्लाह अल्मुताइरीले १ परिवर्तन गर्दै लाइन अप पनि सार्वजनिक गरिसकेका छन् । प्रशिक्षक अब्दुल्लाहले सुजल श्रेष्ठको ठाउँमा आज विशाल राईलाई मैदानमा उतारेका छन् ।

माल्दिभ्सविरुद्धको खेलमा सब्स्टिच्युट खेलाडी मनिष डाँगीले गोल गर्दै नेपाललाई माल्दिभ्सविरुद्ध साफमा पहिलो जित दिलाएका थिए ।

उनले कप्तान किरण चेम्जोङको नेतृत्वमा सार्वजनिक गरेको टोली यस्तो छ:

गोलपिकर : किरण चेम्जोङ (गोलकिपर/कप्तान)
डिफेन्डर : अनन्त तामाङ, रोहित चन्द, सुमन अर्याल
मिडफिल्डर : सुमन लामा, पुजन उपरकोटी, तेज तामाङ, विशाल राई, गौतम श्रेष्ठ
फरवार्ड : नवयुग श्रेष्ठ, अञ्जन विष्ट