२०२३ को डीभी भर्ने मिति घोषणा, अक्टोबर ६ देखि नोभेम्बर ९ सम्म भर्न पाइने

काठमाडौं । अमेरिकी सरकारले डीभी लोटरी २०२३ को आवेदन खुला गर्ने मिति घोषणा गरेको छ । अक्टोबर ६ बुधबार देखि नोभेम्बर ९ मंगलबारसम्म डिभी लोटरी भर्न सकिने अमेरिकी सरकारको विदेश मन्त्रालयले जनाएको छ ।

डिभी २०२३ का विजेताहरुले सन् २०२३ को सेप्टेम्बर ३० सम्म भिसा पाउनेछन् भने नतिजा सन् २०२२ को मे महिनामा आउनेछ । एउटाभन्दा धेरै आवेदन दिनेहरु स्वतः अयोग्य हुने छ ।

यसपटक डीभी भर्नका लागि बंगालादेश, ब्राजिल, क्यानडा, चीन, कोलम्बिया, डोमेनिकन रिपब्लिक, एल साल्भाडोर, हैटी, होण्डुरस, इन्डिया, जमैका, मेक्सिको, नाइजेरिया, पाकिस्तान, फिलिपिन्स, साउथ कोरिया, यूके, भेनेजुएला र भियतनामका नागरिकहरु योग्य हुनेछैनन् ।

तर मकाउ र ताइवानका भने योग्य हुनेछन् । विगत ५ बर्षमा ५० हजारभन्दा धेरै आप्रवासीहरु अमेरिकामा बसाइसराइ गरेका देशका नागरिक डीभी भर्न योग्य हुँदैनन् ।

डीभीका लागि योग्य नभएका देशका नागरिकको दम्पत्ति योग्य देशको भएको खण्डमा त्यस्ता व्यक्ति डिभीका लागि योग्य हुनसक्नेछन् । त्यस्तै बुबाआमामध्ये एक कुनै योग्य देशमा जन्मिएको भए पनि छोराछोरीहरुले उक्त देशको आधारमा डीभी भर्न सक्नेछन् ।

डीभीका लागि योग्य हुन १२ कक्षासम्मको अध्ययन वा तोकिएको कामको अनुभव भएको हुनुपर्छ ।

डीभी भर्दा नाम, जन्ममिति, जन्मस्थान, पासपोर्ट विवरण, फोटो, ठेगाना, फोन नम्बर, इमेल लगायतका विवरणहरु बुझाउनुपर्छ ।

६ महिनाभन्दा पुरानो फोटो डीभीभर्दा प्रयोग गर्न पाइने छैन । त्यस्तै डीभी भर्दा विवाहितले दम्पत्तिको सबै विवरण र बच्चाबच्ची हुनेहरुले उनीहरुको सम्पूर्ण विवरण उल्लेख गर्नुपर्छ ।