तानसेनमा देउवा पक्षका शाक्य निर्विरोध

रुपन्देही । नेपाली कांग्रेस पाल्पाको तानसेन नगर सभापतिमा सुवर्णमुनि शाक्य निर्विरोध निर्वाचित भएका छन् । यसअघि सहमतिका लागि तानसेनका लागि तोकिएको चुनाव रोकिएको थियो । शाक्य पहिलेदेखि नै देउवा समूहमा चिनिएका नेता हुन् ।

१० पालिका रहेको पाल्पामा यसअघि ९ वटामा नेतृत्व चयन भइसकेको छ । जिल्लामा देउवा समूहबाट तानसेन नगरपालिका, रिब्दीकोट, बगनासकाली, तिनाउ र निस्दी गाउँपालिकाका सभापति विजयी भएका छन् ।

पौडेल समूहबाट रामपुर नगरपालिका, माथागढी र रैनादेवी छहरा गाउँपालिकाका सभापतिले जितेका छन् । यद्यपि पौडेल समूहले तिनाउ, बगनासकाली र रिब्दीकोटका सभापति पनि आफ्नो समूहको भएको दावी गरेको छ । पूर्वखोला र रम्भा गाउँपालिकाका सभापति कतै खुलेका छैनन् ।

रामपुरको नगर सभापतिमा नेत्र भट्टराईले २ सय ८ मतमा १ सय २५ मत ल्याएर विजयी भएका थिए । उनका प्रतिस्पर्धी अर्जुन रेग्मीले ८२ मत ल्याएका थिए ।

रिब्दीकोटमा रामचन्द्र पाण्डे विजयी भएका छन् । पूर्वखोलामा विष्णुकुमारी आचार्य अहिलेसम्म प्रदेशको एकमात्र महिला सभापति जित्ने महिला हुन् । उनी कुनै समूहमा खुलेकी छैनन् । निस्दी गाउँपालिकामा पूर्णबहादुर खाँण निर्विरोध सभापति भएका थिए ।

रम्भा गाउँपालिकामा ऋषिराम अर्याल, माथागढीमा दीपक थापा, तिनाउमा प्रेम पाण्डे, बगनासकालीमा थानेश्वर तिमिल्सिना र रैनादेवी छहरामा विष्णु पोखरेल निर्वाचित भएका थिए ।

पाल्पाबाट नेता हरि नेपाल देउवा समूहमा र बीरबहादुर राना पौडेल समूहका हुन् । अहिले पालिकामा निर्वाचित केही मध्यस्त रहेकालाई दुवै समूहले आ–आफ्नो समूहमा गन्ने गरेका छन् ।