न्यायाधीश कार्कीका कारण सभामुख सापकोटाविरुद्धको मुद्दा फेरि हेर्न नमिल्नेमा

काठमाडौं । सभामुख अग्निप्रसाद सापकोटाविरुद्धको हत्या अभियोगको मुद्दा आज पनि हेर्न नमिल्नेमा परेको छ ।

संवैधानिक इजलासको पहिलो नम्बरमै पेसी तोकिएको सो मुद्दा योसहित दर्जन बढी पटक हेर्न नमिल्ने र नभ्याइने भन्दै १० वर्षदेखि चलिरहेको छ ।

संवैधानिक इजलासमा रहेका न्यायाधीश हरिकृष्ण कार्कीका कारण यसअघि पनि हेर्न नमिल्ने सोही मुद्दाको सुनुवाइका लागि आज पनि कार्कीलाई नै इजलासमा राखिएका कारण हेर्न नमिल्ने भएको हो ।

कार्की न्यायाधीश हुनुअघि विपक्षीका तर्फबाट बहस गरेका कारण उनले यो मुद्दा हेर्न नमिल्ने भएको हो । कार्कीको ठाउँमा अर्का न्यायाधीश राखेर इजलास गठन गर्नुपर्नेमा सो जानाजान उनलाई नै राखेर मुद्दा पछि धकेल्न खोजेको आरोप विपक्षको छ ।

काभ्रेका अर्जुन लामाको हत्यामा सापकोटा संलग्न रहेको भन्दै पत्नी पूर्णिमाया लामाले दायर गरेको मुद्दा द्वन्द्वकालीन भएकाले संवैधानिक इजलासमा पठाइएको थियो ।