दुर्गा प्रसाई बने मोटिभेशनल स्पिकर : युवालाई विरोध र कुण्ठामा होइन श्रममा रमाउन दिए टिप्स

काठमाडौं । विवाद र चर्चामा आइरहने बिएण्डसी मेडिकल कलेका सञ्चालक तथा व्यवसायी दुर्गा प्रसाई अब मोटिभेशनल स्पिकरका रुपमा चिनिएका छन् ।
बुधवार सुदूरपश्चिमको धनगढी पुगेका प्रसाईले सयौं युवाको भेलामा जीवनमा सफल हुने उपाय र आफ्नो सफतलाका कथाहरु युवालाई जीवनयोपगी हुने भन्दै सुनाए ।

प्रसाईले भने, ‘आशावादी बनौं किनभने हजारौं निराशावादीको भिडले भन्दा एउटा आशावादी मान्छेले धेर काम गर्न सक्छ । निराशाले अनावश्यक आँशु दिन्छ, रुँदा एक्लै रुनुपर्छ । जसको कुनै अर्थ छैन ।’

प्रसाईले आफ्नो गरिबीका दिनहरु सुनाउँदै अरुको विरोध गर्नुको साटो आफू मेहनत गर्दा सफल भइने टिप्स युवालाई सुनाए । आजका युवामा सामाजिक सन्जालबाट सिको गरेर आरिस, डाह र विरोध गर्ने प्रवृति विकास भएकोमा उनले चिन्ता व्यक्त गरे ।

प्रसाईले भने, ‘मलाई श्रम गर्न कहिल्यै लाज लागेन । गाउँमा गाई भैंसी पालेँ, गोबर सोहोरेँ, पसलमा दूध बेच्न हिँडे । श्रमका कुनै सीमा हुँदैनन् तर मेरो श्रमलाई सम्मान गर्नेभन्दा मेरो परिश्रमको बैभवमा रिस गर्नेहरु धेरै छन् । यसले मलाई कति पनि विचलित बनाउँदैन ।’

आफूले पढ्न नपाए पनि छोरा र छोरीलाई डाक्टर बनाएकोमा गर्व गर्दै उनले युवाहरुलाई जागिरे मानसिकता र इजी मनीतिर नलाग्न र श्रमको बलमा आफैं आत्मनिर्भर हुन सुझाए ।

आफूले बिएण्डसी मेडिकल कलेज काठमाडौं शहरमा खोल्नुको साटो विर्तामोडमा खोल्नुको उद्देश्य दुर्गमका मान्छेलाई सेवा दिनु रहेको भन्दै उनले अरुको डाह र विरोध नगरी कर्ममा लागिरहँदा सफल हुने टिप्सहरु सुनाएका थिए ।

प्रसाई अहिले मेडिकल कलेजबाहेक अन्य उद्यममा समेत लागेका छन् । शर्माले आफ्नो विरोध गर्नेहरुको कुभलो नचिताई उनीहरुको विरोध र कुण्ठाबाट अझ प्रगतितर्फ लाग्नुपर्ने सुझाव दिए ।