नेकपा एसमा जान पाउँ भन्ने सांसदको मुद्दामा आज आदेश आउने सम्भावना

काठमाडौं । नेकपा एमालेको अभिलेखबाट आफ्नो नाम हटाएर नेकपा एसमा अद्यावधिक गर्न पाउँ भन्दै सांसद सोमप्रसाद पाण्डे र शारदादेवी भट्टले दायर गरेको रिटमाथि आज आदेश आउने देखिएको छ ।

दुईपटक सुनुवाइका लागि पेसीमा चढेर पनि हेर्न नभ्याइएको सो मुद्दा आज मीरा खड्काको इजलासमा एक नम्बरमा राखिएको छ । सामान्यतः यस्तो मुद्दाको सुनुवाइ लगातार पर्दा पहिलो नम्बरमा नहुने गरे पनि पाण्डेसहितको मुद्दालाई प्राथमिकता दिइएको छ ।

पछिल्लो समय एमाले र केपी ओलीसँग सम्बन्धित मुद्दाहरू असार २८ को फैसलामा संलग्न न्यायाधीशहरूकै इजलासमा पार्ने गरिएको टिप्पणी भइरहेका बेला पाण्डेको मुद्दा पनि यसअघि आनन्दमोहन भट्टराई र आज मीरा खड्काको इजलासमा परेको हो ।

उनीहरू दुवैजना असार २८ को फैसला गर्ने संवैधानिक इजलासमा थिए । सोमप्रसाद पाण्डे र माया भट्टले आफूहरुले नेकपा एसको पक्षमा सनाखत गर्न जाँदा निर्वाचन आयोगले नदिएको भन्दै रिट दायर गरेका थिए ।