क्रान्तिकारी उपाध्यक्षको चेतावनी- एमसीसी पास गरिए सडकमा आगो बाल्छौं

काठमाडौं । सत्तारुढ दल नेकपा माओवादी केन्द्रनिकटको विद्यार्थी संगठन अखिल (क्रान्तिकारी) का उपाध्यक्ष तिलकराज भण्डारीले एमसीसी पास गरिए सडकमा आगो बाल्ने चेतावनी दिएका छन् ।

पाँचथरको फिदिममा जिल्ला भेलालाई सम्बोधन गर्दै विद्यार्थी नेता भण्डारीले सरकारलाई उक्त चेतावनी दिएका हुन् । मुलुकलाई विदेशीको खेल मैदान बन्न नदिइने भन्दै नेता भण्डारीले सरकार गठन भएको लामो समयसम्म पनि मन्त्रिमण्डल पूर्णता नदिएर सरकारले पुन: जनताको आकांक्षामा चिसो पानी खन्याउन खोजेको आरोपसमेत लगाए ।

कार्यक्रममा माओवादी केन्द्रका नेताहरू होम जवेगु, विशाल रसाइली, दिनेश लावतीसहित प्रदेश १ सांसद सीता थेवे र अखिल (क्रान्तिकारी) प्रवक्ता एवं उपमहासचिव जीपी मैनालीसहित विद्यार्थी नेताहरू मनिषा आचार्य खगेन्द्र सुवेदी ,रवी बस्नेत र प्रजिन हाँगमागले प्रशिक्षण मन्तब्य राखेका थिए ।