प्रदेशसभामा नेकपा एसको शक्ति २३ प्रतिशत-प्रदेश २ र सुपमा एमालेभन्दा ठूलो, गण्डकीमा नील (सूचीसहित)

नेपाल प्रेस

२०७८ भदौ २१ गते १५:४२

काठमाडौं । प्रदेशसभा सदस्यले विभाजित दल रोज्न पाउने एक दिन बाँकी रहदा नेकपा एमालेबाट निर्वाचित ५३ जनाले नेकपा एस रोजेका छन् । सात प्रदेशमा एमालेबाट निर्वाचित २३३ प्रदेशसभा सदस्यमध्ये माधव नेपाललाई ५४ जनाले साथ दिएका हुन् ।

दल रोज्न पाउने समय अझै एक दिन बाँकी छ तर अब यो संख्यामा सर्किट ब्रेक लागेको छ । प्रदेश २ मा ढुलमुल रहेका २ जना सुदूरपश्चिममा ४ जनाले अन्तिम घडीमा नेकपा एस रोजेसँगै अब एमाले छाड्ने प्रदेशसभा सदस्यको संख्यामा सर्किट लागेको छ ।

संघीय संसदमा एमालेका १५५ मध्ये ३० जनाले नेकपा एसमा सनाखत गर्दा करिब २० प्रतिशत सांसद पुगेका थिए भने प्रदेशसभामा करिब २३ प्रतिशतले एमाले छाडेका छन् । स्थानीय तहमा भने यो संख्या निकै कम हुने देखिन्छ ।

एमालेलाई प्रदेशसभामा सबैभन्दा क्षति प्रदेश २ र सुदूरपश्चिममा भएको छ भने गण्डकीमा एकजना पनि नेकपा एसमा सनाखत गर्न गएनन् । लुम्बिनीमा एकजनाले मात्र एमाले छाडेका छन् ।

एमालेबाट विभाजित नेकपा एस प्रदेश २ र सुदूरपश्चिममा एमालेबाट ठूलो दल बनेको छ । वागमती र प्रदेश १ मा एमालेको सरकार ढाल्ने हैसियत नेकपा एसले बनाएको छ भने कर्णालीमा यसअघि नै एमालेलाई सत्तामा जानबाट नेकपा एसले रोकिसकेको थियो ।

१० बुँदे कार्यन्वयनसँगै माधव नेपाल छाडेर एमालेमै बसेका मध्यमार्गी धारका नेताका कारण एमाले प्रदेश १ र वागमतीमा ठूलो क्षतिबाट जोगिएको छ । प्रदेशसभा सदस्यका कारण सरकार ढले पनि संगठनमा एमालेलाई क्षति कम भएको छ ।

संघीय सांसद भन्दा प्रदेश सांसद धेरै नेकपा एसमा समाहित हुनुको एउटा कारण अब सबै प्रदेशमा सो पार्टीले मन्त्री पाउने भएर पनि हो । दोस्रो कारण चुनावका बेला केपी ओलीले संघीय संसदमा आफू निकट धेरैलाई टिकट दिएपछि माधव नेपाल पक्षले प्रदेशमा टिकट पाउँदा उनीनिकटको संख्या बढ्यो ।

यदि मध्यमार्गी नेताहरू पनि विभाजनमै सहभागी हुन्थे भने यो संख्या बढेर करिव ३५ प्रतिशत पुग्ने थियो । मध्यमार्गी नेताका कारण प्रदेश १ मा कम्तीमा ९ जना, वागमतीमा कम्तीमा १० जना, गण्डकीमा १ जना, लुम्बिनीमा १ जना, कर्णालीमा १ जना र सुदूरपश्चिममा कम्तीमा ३ जना रोकिएका छन् ।

प्रदेश १

प्रदेशसभामा एमालेका ५१ जना सांसद थिए, विभाजनपछि नेकपा एसमा १० जना गएका छन् । भीम आचार्य र योगेश भट्टराई एमालेमै रहेका कारण ९ जना प्रदेशसभा सदस्य नेकपा एसमा जानबाट रोकिएका छन् ।

त्यस्तै आचार्य र भट्टराई एमालेमै बस्दा ताप्लेजुङ, उदयपुर, सुनसरी, तेह्रथुम र ओखलढुंगामा अध्यक्ष पनि माधव नेपाल समूह छाडेर एमालेमा रोकिएका छन् भने स्थानीय तहमा समेत एमालेलाई फाइदा भएको छ ।

प्रदेश २

प्रदेश २ मा प्रदेशसभातर्फ एमालेलाई क्षति भएको छ । नेकपा एसमा १३ जना सांसदले सनाखत गर्दा एमालेमा ८ जनामात्र बाँकी रहेका छन् । तर, स्थानीय तहमा भने नेकपा एसतर्फ कम जनप्रतिनिधिमात्र खुलेका छन् ।

नेकपा एमाले विभाजनमा नजाने मध्यमार्गी नेताहरूको प्रभाव प्रदेश २ मा भने देखिएन । हिजो माधव नेपाल समूहमा जो जो थिए उनीहरू सबै नेकपा एसमा समाहित भएका छन् ।

वागमती

वागमती प्रदेशमा नेकपा एसले अष्टलक्ष्मी शाक्यको सरकारलाई अल्पमतमा पारिसकेको छ । ५६ जनामध्ये १३ जना प्रदेशसभा सदस्यले नेकपा एसको पक्षमा सनाखत गरेका छन् ।

मध्यमार्गी धारको प्रभाव भने यो प्रदेशमा देखिएको छ । अष्टलक्ष्मी शाक्य, सुरेन्द्र पाण्डे, रघुजी पन्त, अरुण नेपाललगायतका नेता एमालेमै रहँदा सिन्धुपाल्चोक, रामेछाप, नुवाकोट, काठमाडौं, ललितपुर, सिन्धुलीलगायतका जिल्लामा नेकपा एसमा जानबाट धेरै नेता कार्यकर्ता र जनप्रतिनिधि रोकिएका छन् ।

गण्डकी

नेकपा एमाले विभाजनको सबैभन्दा कम असर गण्डकीमा परेको छ । गण्डकी प्रदेशसभामा २७ जना सांसद रहेको एमालेका एकजना पनि नेकपा एसमा गएनन् । विगतमा माधव नेपाल समूहमा रहेका ईन्द्रलाल सापकोटासमेत एमालेमै बसेपछि गण्डकी प्रदेशसभामा नेकपा एसको प्रतिनिनिधत्व नहुने भएको छ ।

साविक जेठ २ को एमाले र त्यसपछिको नेकपा हुँदाका एकजना पनि जिल्ला अध्यक्ष नेकपा एसमा गएनन् । स्थानीय तहमा जनप्रतिनिधि पनि नेकपा एसमा सनाखत गर्न अत्यन्तै न्यूनमात्र गएका छन् ।

लुम्बिनी

नेकपा एमालेका सबैभन्दा धेरै स्थायी कमिटी सदस्य रहेको लुम्बिनीमा घनश्याम भुसाल, गोकर्ण विष्ट, युवराज ज्ञवालीलगायतका नेता एमालेमै बसेपछि धेरै जनप्रतिनिधि र नेता कार्यकर्ता नेकपा एसमा जानबाट रोकिएका छन् ।

३७ जना प्रदेशसभा सदस्यमध्ये मन्त्री बन्न पाउने भएपछि एकजना रमा घर्तीमात्र नेकपा एसमा सनाखत गर्न गएकी छन् । माधव नेपाल पक्षका अर्का सांसद विष्णु पन्थी भने एमालेमै रोकिएका छन् ।

कर्णाली

माधव नेपाल पक्षको सबैभन्दा राम्रो प्रभाव भएको मानिने कर्णालीमा प्रदेशसभा सदस्यमध्ये ४ जनाले यसअघि नै फ्लोर क्रस गरेर पद गुमाइसकेका छन् । थप तीनजनाले सनाखत गरेर नेकपा एस रोजेपछि अब एमालेको संख्या १३ मा झरेको छ ।

कर्णालीका जिल्ला अध्यक्ष र स्थानीय जनप्रतिनिधिहरू भने कमैमात्र माधव नेपाल पक्षमा उभिएका छन् ।

सुदूरपश्चिम

सुदूरपश्चिम प्रदेशमा माधव नेपालको शक्ति भीम रावलको भन्दा बढी देखियो । प्रेम आलेले उनलाई साथ दिएका कारण नेकपा एस एमालेभन्दा ठूलो पार्टी बन्न सफल भएको छ ।

एमालेका २५ जना प्रदेशसभा सदस्यमध्ये १४ जनाले नेकपा एस रोजेका छन् । संघीय संसदका ७ जना लिएर ओली छाडेका आलेले प्रदेशसभामा पनि नेकपा एसलाई एमालेभन्दा ठूलो बनाउन कम्तीमा ४ सांसद थपेका छन् ।

सुदूरपश्चिममा भीम रावलका कारण नेकपा एसमा जानबाट ३ जनामात्र रोकिएका छन् ।