नेकपा एसको दस्तावेज मस्यौदाको जिम्मा झलनाथ खनाललाई

काठमाडौं । नवगठित नेकपा (एकीकृत समाजवादी) ले वरिष्ठ नेता झलनाथ खनाललाई पार्टीका दस्तावेजको मस्यौदा गर्ने जिम्मेवारी दिएको छ ।

खनाल नयाँ दिल्लीस्थित एपोलो अस्पतालमा मिर्गौला प्रत्यारोपण गरी १४ भदौमा स्वदेश फर्किएका थिए । निवासमा आराम गरिरहेका उनले राजनीति सक्रियता बढाइसकेका छैनन् ।

नेकपा एसले खनाल नेतृत्वमा १३ सदस्य रहेको मस्यौदा कमिटी गठन गरेको हो । नेकपा एसले हालै जारी गरेको अन्तरपार्टी निर्देशन (अपानी) मा चाँडै गरिने राष्ट्रिय सम्मेलनमा पेस गरिने राजनीतिक लगायतका प्रतिवेदनको मस्यौदा तयार पार्न कमिटी बनाइएको उल्लेख गरिएको छ।

पार्टी दर्ता गर्दा निर्वाचन आयोगमा पेस गरिएका दस्तावेज परिमार्जन पनि यही कमिटीले गर्ने बताइएको छ । कमिटीमा डा. बेदुराम भुसाल, प्रमेश हमाल, राजेन्द्र पाण्डे, डा. गंगालाल तुलाधर, डा. विजय पौडेल, प्रकाश ज्वाला, जगन्नाथ खतिवडा, केशवलाल श्रेष्ठ, सावित्रा भुसाल, रामकुमारी झाँक्री, राजेन्द्र राई र गणेश विक छन् ।