पानी परेन भने नेपालविरुद्ध राम्रो फुटबल खेल्छौंः भारतीय प्रशिक्षक इगोर

काठमाडौं । भारतीय राष्ट्रिय फुटबल टोलीका मुख्य प्रशिक्षक इगोर स्टामिकले नेपालविरुद्धका मैत्रीपूणै खेलमा राम्रो फुटबल खेल्ने बताएका छन् ।

नेपालले सन् २०१५ पछि पहिलो पटक भारतसँग बिहीबार र आइतबार दशरथ रंगशालामा फुटबल खेल्दै छ । बिहीबार साँझ ५ः ३० बजे नेपाल र भारत ६ वर्षपछि भिड्दै छन् । सन् २०१९ देखि भारतीय टोलीका नेतृत्व गरेका स्टामिकले पहिलो पटक नेपाली टोलीविरुद्ध भारतको टच लाइनमा हुनेछन् ।

र, भोलिको खेलमा मौसमले साथ दियो र पानी परेन भने राम्रो फुटबलका लागि कोशिस गर्ने उनले बताए । दुवै टोली साफ च्याम्पियनसिपको तयारी गरिरहेकाले मैत्रीपूर्ण खेल फाइदाजनक हुने बताए ।

‘पानी परेन भने राम्रो फुटबल खेल्ने प्रयास गर्नेछौं । हामी आफ्नो उत्कृष्ट दिनेछौं । साफ अगाडि यो खेल खेल्न पाउनु राम्रो कुरा हो,’ बुधबार प्रि–म्याच प्रेस कन्फरेन्समा प्रशिक्षक क्रोएसियन प्रशिक्षकले भने, ‘नेपालले पछिल्लो समय राम्रो ‘प्रोग्रेस’ गरेको छ । राम्रो फुटबल खेल्न सक्छ भन्ने देखाएको छ ।’

आफ्ना समकक्षी अब्दुल्लाह अल्मुताइरीले युवा खेलाडीलाई टोलीमा मौका दिएर राम्रो कार्य गरेको बताए ।

यस्तै भारतीय टोलीका कप्तान सुनिल क्षेत्रीले नेपालसँग खेल्नु सधैँ कठिन हुने बताए ।

‘जहिल्यै पनि नेपालविरुद्ध कठिन हुन्छ । नेपाली टोली जस्तो परिस्थितिमा पनि हामीलाई कठिन हुन्छ,’ सुनिलले भने, ‘युवा खेलाडीसँग मैले धेरै खेलेको छैन ।

‘हामीले नेपालविरुद्ध सन् २०१५ मा अन्तिम पटक खेलेका थियौं,’ उनले भने, ‘त्यो बेला हामीलाई कठिन भएको थियो । पहिलो हाफमा गोलरहित बराबरीमा रोकिएका थियौं,’ उनले भने, ‘नेपालविरद्ध गोल गर्न पनि भारतलाई सधैँ कठिन हुने गरेको छ । नेपाल जुन फर्ममा भए पनि हामीलाई खेल्न गाह्रो हुन्छ । त्यही कुरा हामीले प्रशिक्षकलाई पनि भनेका छौं ।’

नेपालसँग पारिवारिक सम्बन्ध भएका सुनिलले नेपालप्रति आफ्नो हृदयमा ‘सफ्ट कर्नर’ रहेको बताए । पत्रकारहरूसँग नेपालीमै कुरा गर्दै उनले भने, ‘माफ गर्नुस्, राम्ररी नेपाली बोल्न आउँदैन बुझ्न चाहिँ बुझ्छु । मामाहरु यहीँ बस्नु हुन्छ । अहिले पनि धेरै रिलेटिभहरू काठमाडौैं, झापा पोखरामा हुनुहुन्छ । खेल सकिएपछि म भेट्ने कोसिस गर्छु ।’