इङ्ल्यान्डविरुद्ध तेस्रो टेस्टको दोस्रो इनिङमा भारतले जोड्यो २१५ रन

काठमाडौं । हेडिङ्ग्लेमा जारी इङ्ल्यान्डविरुद्धको तेस्रो टेस्टको दोस्रो इनिङमा भारतले २ सय १५ रन बनाएको छ । ३ सय ५४ रनले पछाडि परेर ब्याटिङमा उत्रिएको भारतका लागि रोहित शर्मा ५९ रन बनाएर आउट हुँदा केएल राहुल ८ रनमा सीमित भए ।

यद्यपि, चेतेश्वर पुजार र कप्तान विराट कोहलीले सम्हालिएर ब्याटिङ गरेसँगै भारतले २ सय १५ रन जोडेको हो । पुजारले १५ चौकासहित अविजित ९१ रन बनाउँदा कोहलीले ६ चौकासहित ४५ रन जोडेका छन् ।

टेस्टको तेस्रो दिन सकिँदा भारत अझै १३९ रनले पछाडि छ । जो रुटको शतकप्रेरित इङ्ल्यान्डले यसअघि पहिलो इनिङमा ४ सय ३२ रन बनाएको थियो ।

त्यस्तै भारत पहिलो इनिङमा ७८ रनमा सीमित भएको थियो । पाँच खेलको श्रृंखलामा भारत १–० ले अगाडि छ ।

पहिलो टेस्ट वर्षाले प्रभावित हुँदा दोस्रो टेस्ट भारतले जितेको थियो ।