उपराष्ट्रपति कार्यालयको शाखा अधिकृत हुँ भन्दै ठगी गर्ने पक्राउ

काठमाडौं । उपराष्ट्रपति कार्यालयको शाखा अधिकृत हुँ भन्दै ठगी गरेको आरोपमा एक जना पक्राउ परेका छन् ।

पक्राउ पर्नेमा डोटी केआईसिंह गाउँपालिका -६ घर भई हाल किर्तिपुर नगरपालिका -७ काठमाडौं बस्ने २६ वर्षीय कुशल भट्ट भनिने केशवरराज भट्ट रहेका छन् ।

भट्टले निजामती कर्मचारीको पोशाक समेत लगाएर उपराष्ट्रपति कार्यालयको नाम दुरुपयोग गरी बिभिन्न व्यक्तिहरुलाई अनेक बहानामा झुक्याएर ठगी गरिरहेको सूचनाको आधारमा उनलाई पक्राउ गरिएको हो । उनलाई कलंकी स्युचाटारबाट पक्राउ गरिएको महाशाखाले जनाएको छ ।

प्रहरीले उनको साथबाट प्रयोग गर्ने गरेको सिमकार्डसहितको आइफोन १ थान, केशवराज भट्ट नामको प्रभु बैंकको एटिएम १ थान, किशोर भट्ट नामको त्रि-चन्द्र कलेजको बिद्यार्थी परिचयपत्र १ थान र किशोर भट्ट नामकै नेपाल प्रहरी अस्पतालको ब्लड ग्रुप कार्ड १ थान फेला पारेको छ ।

अनुसन्धानको क्रममा यस अघि पनि २०७५ चैत २६ गते यस्तै प्रकृतिको साइबर क्राइम र ठगी मुद्दामा महाशाखाबाट उनलाई पक्राउ गरिएको थियो । भट्टले १ बर्ष कैद र ३० हजार जरिवानाको सजाय भुक्तान गरिसकेका प्रारम्भिक अनुसन्धानबाट खुल्न आएको छ ।

भट्टले कतिपय व्यक्तिहरुलाई सामाजिक सञ्जाल मार्फत् चिनजान गरि साथी बनि आफू परराष्ट्र मन्त्रालयको सह(सचिव समेत हुँ भनि विश्वासमा पारी ठगी गर्दै आएको समेत पाइएको छ ।

साथै अन्य कोही व्यक्तिहरु भट्टबाट पीडित भएको भए महाशाखामा सम्पर्क गर्न आग्रह गरेको छ । थप आवश्यक अनुसन्धान कार्य भइरहेको छ।