जागेश्वरको प्रष्टोक्ति- शान्ति सुरक्षा कायम गर्न प्रहरीको सहयोग लिनुपर्‍यो

काठमाडौं । कोभिड युनिफाइड केन्द्रीय अस्पताल (वीर) का प्रशासकीय प्रमुख डा. जागेश्वर गौतमले आन्दोलनरत स्वास्थ्यकर्मी र कर्मचारीसँग आउँदा दिनमा सौहार्दपूर्ण वातावरणमा छलफल गर्न सकिने बताएका छन् ।

समस्या समाधान गर्न दुई पक्षबीच छलफल भइरहेको बेला कर्मचारीले आन्दोलन गरेपछि प्रहरी प्रशासनको सहयोग लिनुपरेको उनको भनाइ छ । मंगलबार विज्ञप्तिमार्फत गौतमले समाधानका लागि निचोडमा पुग्ने क्रममा रहेको बेला कर्मचारीहरू आन्दोलित भएपछि शान्ति सुरक्षा कायम गर्न लागि प्रहरी प्रशासनको सहयोग लिनुपरेको जिकिर गरेका छन् ।

प्रहरीको सहयोग लिँदा व्यवस्थापन र कर्मचारीबीच वैमनस्यताको वातावरण सिर्जना भएको भन्दै दु:ख व्यक्त गरे ।

गौतमले लेखेका छन्,‘ समस्या समाधानको क्रममा व्यवस्थापन पक्ष र कर्मचारी वर्गबीच समय समयमा छलफल भई निचोडमा पुग्ने क्रममा मिति २०७८।४।१७ आइतबारका दिनको छलफलमा केही कर्मचारी साथीहरुले ठेलम ठेल गरी असहज परिस्थितिको सृजना भई शान्ति सुरक्षा कायम गर्नको लागि प्रहरी प्रशासनको सहयोग लिनु परेको अवस्थाले गर्दा व्यवस्थापन र कर्मचारीबीच वैमनस्यताको वातावरण सृजना भएकोमा अस्पताल प्रशासन दुःख प्रकट गर्दै आगामी दिनमा सवै प्रकारका समस्यहरुको समाधान सौहार्दपूर्ण वातावरणमा आपसी छलफल र संवादवाट गर्न सकिने व्यहोरा अनुरोध गरिन्छ।’

अस्पतालमा आम्दानी घटेकाले कर्मचारीहरूले विगतमा खाइपाइ आएको सेवा सुविधा प्रदान गर्न असहज भएको उनको दावी छ ।