कोरोनाको खोप लगाउने प्रत्येक अमेरिकीलाई सय डलर दिन राष्ट्रपति बाइडेनको निर्देशन – Nepal Press

कोरोनाको खोप लगाउने प्रत्येक अमेरिकीलाई सय डलर दिन राष्ट्रपति बाइडेनको निर्देशन

एजेन्सी । अमेरिकी राष्ट्रपति जो बाइडेनले कोरोनाको खोप लगाउने देशका प्रत्येक नागरिकलाई प्रोत्साहन स्वरुप १०० डलर प्रदान गर्न निर्देशन दिएका छन् ।

खोप अभियानलाई प्रभावकारी बनाउँदै कोरोना विरुद्ध जित हासिल गर्ने रणनीतिस्वरुप उनले राज्य तथा स्थानीय सरकारहरुलाई यस्तो निर्देशन दिएको अमेरिकी अर्थ मन्त्रालयले जनाएको छ ।

‘राष्ट्रपतिले राज्य, क्षेत्रीय तथा स्थानीय सरकारहरुलाई प्रत्येक नयाँ भ्याक्सिन लगाउने अमेरिकीहरुलाई अतिरिक्त प्रोत्साहनस्वरुप १०० डलर भुक्तानी गर्न आह्वान गर्नुभएको छ,’ मन्त्रालयले एक विज्ञप्ति जारी गरी भनेको छ, ‘यसका लागि आवश्यक प्राविधिक सहायताका लागि मन्त्रालय तयार छ ।’

देशका केही भागहरुमा कोरोना संक्रमणका कारण मानिसहरु अस्पताल भर्ना हुने क्रम बढेको अवस्थामा पनि खोप अभियान सुस्त भएपछि बाइडेनले सो निर्देशन दिएका हुन् । अहिलेसम्म ५७.१ प्रतिशत अमेरिकीहरुले कोरोनाविरुद्धको पूरा डोज खोप लगाइसकेका छन् ।

यस वर्षको सुरुवातदेखि अमेरिकामा कोभिडका कारण मृत्यु भएका मध्ये ९९.२ प्रतिशत खोप नलगाएकाहरु रहेको तथ्यांकले देखाएको छ ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर