सुदूरपश्चिम प्रदेशसभा : नेपाल-भारत सीमामा तारबार लगाउन माग – Nepal Press

सुदूरपश्चिम प्रदेशसभा : नेपाल-भारत सीमामा तारबार लगाउन माग

कैलाली । सुदूरपश्चिम प्रदेशसभा सदस्य तारा लामा तामाङले प्रदेश सरकारलाई नेपाल-भारत सीमा क्षेत्रमा तारबार लगाउन माग गरेका छन् ।

नीति तथा कार्यक्रममाथिको छलफलको क्रममा उनले भारतीय पक्षले पटकपटक सीमा क्षेत्रमा अवरोध गर्ने गरेको भन्दै तारबार लगाउनुपर्ने बताएका हुन् ।

‘नेपाली भूमि भारतले अतिक्रमण गर्न खोजेको छ । विकासको आयोजना रोक्ने काम गर्छ’ उनले भने, ‘सबै ठाउँमा ठूलो संरचना निर्माण गर्न नसके पनि तारबार गर्नुपर्छ ।’

भारतीय सीमा सुरक्षा बल (एसएसबी) ले कञ्चनपुरमा निर्माण भइरहेको हुलाकी सडकमा पनि पटकपटक अवरोध गरिरहेकोतर्फ औंल्याउँदै उनले कञ्चनपुरदेखि दार्चुलासम्मको सीमा व्यवस्थित गर्न माग गरेका छन् ।

‘केन्द्रसँग समन्वय गरेर तारबार गर्नुपर्छ । यो राष्ट्रियताको सवालसँग जोडिएको विषय हो’, उनले भने, ‘भारत आउने-जाने कामदारहरूको पनि व्यवस्थापन राम्ररी गर्नुपर्छ नत्र भविष्यमा धेरै संकट आउन सक्छ।’

तामाङ भारतीय पक्षबाट हत्या गरिएका गोविन्द गौतमको क्षेत्रबाट प्रदेशसभामा निर्वाचित सांसद हुन् । २०७३ फागुन २६ मा नेपाली भूमि अतिक्रमणको विषयमा विवाद हुँदा भारतीय पक्षको गोली लागेर गौतमको मृत्यु भएको थियो । अहिले पनि यहाँ सीमा विवाद कायमै छ ।

सरकारले नीति तथा कार्यक्रमै यी विषय ल्याउनुपर्ने सांसद तामाङले माग गरे । बिहीबार प्रस्तुत नीति तथा कार्यक्रममाथि सोमबार छलफल सकिँदैछ ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर
नेपाल अपडेट ट्रेन्डिङ