लेभान्टेसँग बराबरीमा रोकिएपछि बार्सिलोनालाई ला लिगाको उपाधि लक्ष्यमा धक्का

एजेन्सी । बार्सिलोनाले २–० को अग्रता जोगाउन नसक्दा गएराति ला लिगामा लेभान्टेसँग ३–३ गोलको बराबरी खेलेको छ । यो बराबरीले सिजनको अन्त्यतिर लिगको उपाधि जित्ने बार्सिलोनाको लक्ष्यमा गम्भीर धक्का लागेको छ ।

लियोनल मेस्सीले लो भलीमार्फ अग्रता दिलाएका थिए । मेस्सीले जारी सिजन सबै प्रतियोगितामा गरी ३७ औं गोल गरेका हुन् । ओस्मान डेम्बेलेको क्रसमा पेड्रीले अर्को गोल गरी पहिलो हाफमा बार्सिलानालाई दोहोरो अग्रता दिलाएका थिए ।

तर दोस्रो हाफमा सानदार प्रदर्शन गरेको लेभान्टेका लागि गोन्जालो मेलेरो र जोसे लुइस मोरालेसले गोल गरेपछि खेल २–२ को बराबरीमा आयो ।

डेम्बेलेको शक्तिशाली प्रहारमार्फत बार्सिलोनाले पुनः अग्रता बनाए पनि अन्तिम समयमा सर्जियो लियोनले लेभान्टेका लागि बराबरी गोल फर्काए ।

यो जितले बार्सिलोनाले दोस्रो स्थानमा त उक्लिएको छ भर शीर्षमा पुग्ने अवसर गुमाएको छ । बार्सिलोनाको ३६ खेलबाट ७६ अंक छ । एक खेल कम खेलेको शीर्ष स्थानको एट्लेटिको मड्रिडको ७७ र रियल मड्रिडको ७५ अंक छ ।