सांसद ओलीको स्पष्टीकरण- झुक्किएर दिएको विश्वासको मत सच्याएँ, एमालेको निर्देशन मान्छु

सुर्खेत । कर्णाली प्रदेशसभाकी एमाले सांसद देवी ओलीले प्रदेशसभामा गत वैशाख ३ गते भएको मतदानका क्रममा झुक्किएर मुख्यमन्त्री महेन्द्रवहादुर शाहीलाई मत दिए पनि तत्कालै सच्याएको प्रष्टीकरण दिएकी छन् ।

प्रदेशसभा संसदीय दलका नेता यमलाल कँडेललाई बुझाएको स्पष्टिकरणमा सांसद ओलीले आफू नेकपा एमालेको नीति, निर्णय र ह्वीप पालना गर्न प्रतिबद्ध रहेको समेत प्रष्ट पारेकी छिन् ।

ओलीले शुरूमा विश्वास दिए पनि सभामुखले मत सच्याउन दिएको समयमा मत सच्याएर विपक्षमा मतदान गरेकी थिइन् ।

एमालेले भने फ्लोर क्रस गर्ने सांसदको संख्या पुगेर शाही सरकार जोगिएपछि ओलीले योजनाबद्ध रुपमा मत सच्याएको ठहर गरेको छ ।

उनलाई पार्टी केन्द्रीय कमिटीको तर्फबाट अध्यक्ष केपी शर्मा ओलीले समेत स्पष्टीकरण सोधेर मंगलवारै पत्र पठाइसकेका छन् । रुकुमबाट समानुपातिक तर्फ निर्वाचित सांसद ओलीले आफूले तत्कालै सोही दिन पनि मौखिक स्पष्टिकरण दिएको बताएकी छन् ।