कोरोना संक्रमणको त्रासका विचमा पनि चैती छठ मनाइँदै (फोटो फिचर) – Nepal Press

कोरोना संक्रमणको त्रासका विचमा पनि चैती छठ मनाइँदै (फोटो फिचर)

जनकपुरधाम । कोरोना संक्रमणको त्रासका विचमा पनि जनकपुरसहित तराई, मधेसका जिल्लामा श्रद्धापूर्वक चैती छठ मनाइँदैछ । जनकपुरको ऐतिहासिक गंगासागर लगायतका पोखरी तथा जलाशयमा ब्रतालुले आज अस्ताउँदो सूर्यलाई अर्घ अर्पण गरेका छन् ।

शुक्रवारदेखि विधिवत रुपमा सुरु भएको चैती छठका ब्रतालु आज दिउँसो पूजाका विभिन्न समानसहित पोखरी तथा जलाशय पुगेको थिए । छठ मनाउन सिंगारिएको घाटमै राति विश्राम गर्ने र भोली विहान उदाउँसो सूर्यलाई अर्घ चढाएपछि चैती छठ समापन हुन्छ ।

कात्तिक शुक्ल षष्ठीका दिन मनाइने ठूलो छठ हो भने चैत शुक्ल षष्ठीका दिन ‘चैती छठ’ हो । कात्तिक शुक्ल षष्ठीका दिन जसरी नै चैत शुक्ल षष्ठीका दिन पनि छठ मनाइने चलन छ । छठमा ब्रतालुले ४८ घण्टा उपबास बस्नुपर्ने भएकाले यसलाई कठोर ब्रत पनि भनिन्छ ।

पारिवारिक सुख, शान्ति, समृद्धि, शारीरिक कल्याण, रोगबाट मुक्ति तथा विभिन्न मनोकांक्षा पूरा होस् भन्ने उद्देश्यले श्रद्धापूर्वक चैती छठ मनाइन्छ । छठ मनाउने ब्रतालुले भने कोरोना फैलिने त्रास पनि बिर्सेका छन् । छठ घाटमा भीडभाड देखिए पनि स्वास्थ्य सतर्कता भने अपनाइएको छैन् ।

सत्य अहिंसाप्रति मानवको रुचि बढाउने र सबै जीवप्रति सहानुभूति राख्न अभिप्रेरित गर्नु यस पर्वको विशेषता हो । सूर्य उपासना परम्पराको मोहक पद्धति मानिएको संसारमा यही एक यस्तो पर्व हो जसमा अस्ताउँदो र उदाउँदो सूर्यको पूजा गरिन्छ ।

प्रतिक्रिया

Leave a Reply

Your email address will not be published. Required fields are marked *