स्थापनाको १७० वर्षमा रोयटर्सले पायो पहिलो महिला प्रधान-सम्पादक

काठमाडौं । प्रतिष्ठित समाचार संस्था रोयटर्सले पहिलोपटक महिला प्रधान-सम्पादकको नाम प्राप्त गरेको छ । १७० वर्ष लामो इतिहास बोकेको समाचार एजेन्सीले अलेजान्ड्रा गालोनीलाई आगामी प्रधान-सम्पादकको रुपमा नियुक्त गरेको हो ।

रोमकी ४७ वर्षिया गालोनीले वर्तमान प्रधान-सम्पादक स्टेफेन जे एडलरको ठाउँ लिनेछिन् । अघिल्लो दशकदेखि उक्त पदमा रहेर काम गरिसकेका एडलरको कार्यकाल आउँदो महिना सकिँदैछ ।

एड्लरको सम्पादकीय नेतृत्वमा रोयटर्सले सयभन्दा बढी पत्रकारिताका अवार्ड जितेको छ जसमा सात पुलित्जर पुरस्कार समेत सामेल छन् । चार भाषा बोल्न सक्ने गालोनीसँग यसअघि रोयटर्स र वालस्ट्रिट जर्नलमा बिजनेस र राजनीतिक समाचार कभरेज गरेको अनुभव छ ।

२,४५० जना पत्रकार भएको रोयटर्स संसारकै ठूलो समाचार एजेन्सीमध्येको एक हो । सन् २००८ देखि रोयटर्स थोमसन रोयटर्स कप कम्पनीको रुपमा बदलिएको छ जसले सूचना प्रवाहसँगै सफ्टवेयर विकास, वकिल, कर्पोरेसन र करको सेवा दिने क्षेत्रमा समेत काम गर्छ ।

रोयटर्सका प्रमुख कार्यकारी अधिकृत स्टिभ हस्करको रणनीतिमा कम्पनीले अहिलेसम्म सर्वाधिक सेयर–मूल्य कायम गरेको छ । रोयटर्स सीइओ हस्करले विज्ञप्ती जारी गर्दै कम्पनी आगामी दिनमा प्रतिबद्ध र निश्पक्ष पत्रकारितामा समर्पित हुने जनाएका छन् ।