सन्दीप क्षेत्री स्टारर ‘श्री’ चैत २७ गते हल र ओटीटीमा रिलिज हुने

काठमाडौं । ७२ घण्टामै छायांकन सकिएको फिल्म ‘श्री’ आउने शुक्रबार रिलिज हुने भएको छ । कोरोनाभाइरसको दोस्रो लहर सुरु हुने त्रासको बीचमा एभरेस्ट सूर्य बोहोरा निर्देशित फिल्म प्रदर्शन हुन लागेको हो । मुलुक लकडाउनमा भएको बेला बोहोराले आफ्नै निर्माण एवं निर्देशनमा फिल्म तयार पारेका थिए ।

नयाँं बर्ष छेकोमा दर्शकमाझ आउन लागेको फिल्ममा सन्दिप क्षेत्री, बर्षा शिवाकोटी, बुद्धि तामाङ, राजाराम पौडेल, बसुन्धरा भुसाल, रबिन्द्र झा, भोला सापकोटा लगायतको अभिनय छ ।

साथै फिल्ममा कमलजंग बोहरा, मोहनकृष्ण श्रेष्ठ, सविता गुरुङ, नवीन श्रेष्ठ, श्यामसुन्दर पुडासैनी र बालकलाकार न्यासिका कार्कीले समेत अभिनय गरेका छन् ।

ओटिटीमा मात्रै रिलिज गर्ने तयारी गरिएको भएपनि ट्रेलर हेरेपछि भने यो फिल्म हलमै प्रदर्शन गर्नुपर्छ लागेर आफैले पहल गरेको बितरक करण श्रेष्ठले जानकारी दिए । ‘कोरोनाका कारण थला परेको चलचित्र उद्योगको श्रीबृद्धिमा ‘श्री’ ले ठूलो योगदान गर्ने बिश्वास मैले लिएको छु’ उनले भने ।

फिल्मका मुख्य पात्र क्षेत्रीले यो फिल्म आफ्ना लागि निकै महत्वपूर्ण रहेको बताए । ‘मैले अहिलेसम्म अभिनय गरेका फिल्ममध्ये ‘श्री’ उत्कृष्ट छ । मैले मेरा सन्ततिलाई तिम्रो बाबुको फिल्म हो भनेर गर्वका साथ देखाउन सक्छु,’ उनले भने, ‘त्यस्तो बिषम परिस्थितिमा पनि सूर्य दाईले आँट गरेर फिल्म बनाउनु भयो । अहिले यस्तो अबस्थामा करणजीले प्रदर्शन गर्दै हुनुहुन्छ । यसमा मलाई निकै गर्व लागेको छ ।’

अभिनेता भोला सापकोटाले ‘श्री’ मा आफूले निर्वाह गरेको भूमिकाका साथै समग्र फिल्मको चर्चा गरे । उनले बिषम परिस्थितिमा समेत हिम्मतका साथ फिल्म निर्माण गरि प्रदर्शन गर्न लागीएकोमा खुशी प्रकट गरे । फिल्मकी निर्मात्री तथा अभिनेत्री सबिता गुरुङले चलचित्र प्राबिधिकलाई राहत स्वरुप ‘श्री’ निर्माण गरिएको स्मरण गर्दै अब यसले हललाई पनि राहत दिने बिश्वास ब्यक्त गरिन् ।

अहिले अमेरिकामा रहेका निर्देशक बोहराको भनाइ छ, ‘जम्मा छ दिनमा कुल ७२ घण्टा क्यामेरा रोल भएको यो फिल्ममा भरपुर मनोरञ्जनका साथै उपयोगी सन्देशसमेत प्रस्तुत छ ।’

निर्देशक बोहराकै लेखनमा शिबम अधिकारीले सघाएको फिल्मलाई शेरबहादुर तामाङले खिचेका हुन् । सुजन बडालको सम्पादन र एलिस कार्कीको ब्याकग्राउन्ड स्कोर छ । यो फिल्म ओटीटी र हलमा एकसाथ रिलिज हुनेछ ।