प्रभु साहको टिप्पणी– एमालेको समेत मतबाट निर्वाचित सांसदमाथि प्रचण्डको प्रतिगामी हमला – Nepal Press

प्रभु साहको टिप्पणी– एमालेको समेत मतबाट निर्वाचित सांसदमाथि प्रचण्डको प्रतिगामी हमला

काठमाडौं । शहरी विकासमन्त्री प्रभु साहले तत्कालीन एमाले र माओवादीको साझा घोषणापत्र र संयुक्त मतबाट निर्वाचित जनप्रतिनिधिमाथि प्रचण्डले प्रतिगामी हमला गरेको आरोप लगाएका छन् ।

रौतहट क्षेत्र नम्बर ३ बाट निर्वाचित सांसद साहसहित माओवादीका चार प्रत्यक्ष निर्वाचित सांसदहरुको पद रिक्त गराउन माओवादी केन्द्रले संसद सचिवालयमा सूचना दर्ता गराएकोमा उनले यसलाई अनैतिक र प्रतिगामी हमला भनेका छन् ।

साहले विज्ञप्तिमार्फत निर्वाचित जनप्रतिनिधिलाई त्रसित र सिंगै संसदलाई पंगु बनाउने खेलले आफूलाई कथित संसद पुनःस्थापनाको पक्षधर बताउनेहरु नांगो भएको टिप्पणी गरेका छन् ।

साहले भनेका छन्- आफू चुनाव जित्नलाई नेकपा एमालेसँग एकता/सहकार्य गर्ने,नेकपा अध्यक्षको हैसियतमा सर्वोच्च अदालतमा पुनरावलोकन गर्ने र अहिलेसम्म सरकारलाई समर्थन दिईराख्नेहरुले हामी साझा घोषणापत्र एवं संयुक्त मतबाट निर्वाचित प्रतिनिधिप्रतिधिमाथि कथित दल त्यागको कानुनी डण्डा चलाउनु कुनै पनि नैतिकताले सुहाउँदैन ।

एमाले केन्द्रीय सदस्य समेत रहेका साहले प्राविधिक र कानूनी आडमा संसद र जनताको सच्चा प्रतिनिधिको रुपमा क्रियाशील सांसदहरुको पदमाथि अनुचित हमलाको दुस्प्रयास गर्नु आफैंमा प्रतिगामी कार्य रहेको बताएका छन् ।

साहले माओवादी पार्टीले आफूलाई सोधेको स्पष्टीकरणको जवाफ पनि सार्वजनिक गरेका छन् । चैत २ गते उनले अध्यक्ष प्रचण्डलाई सम्बोधन गरेर पठाएको स्पष्टीकरणमा आफू पार्टी एकताको अभियानमै दृढतापूर्वक लागेको यो अभियानमा लाग्दा अमूक पार्टीको केन्द्रीय कमिटी सदस्य जस्ता कुरा गौण रहेको जनाएका छन् ।

माओवादीले मंगलवार संसद सचिवालयमा लेखराज भट्ट, टोपवहादुर रायमाझी, प्रभु साह र गौरीशंकर चौधरीले दल त्याग गरेको सूचनासहित सांसद पद खारेजीको निवेदन दर्ता गराएको छ ।

नेकपा माओवादी केन्द्रले सोधेको स्पष्टीकरणमा साहकाे जवाफ

प्रतिक्रिया

Leave a Reply

Your email address will not be published.

सम्बन्धित खवर