१४ वर्षिय किशोरले गरेका थिए दिपाश्री र सरोज खनालको फेसबुक ह्याक !

काठमाडौं । नेपाली चलचित्र क्षेत्रका कलाकारहरुले प्रयोग गर्दै आएको सामाजिक संजाल फेसबुक आइडी ह्याक गरेर रकम मागेको आरोपमा प्रहरीले एक किशोरलाई पक्राउ गरेको छ । उनी केवल १४ वर्षका छन् । 

साइबर ब्यूरोेले पर्सा बहुदरमाई नगरपालिका -५ बस्ने १४ वर्षीय बालकलाई सोमबार पक्राउ गरेको ब्युरोका एसएसपी नविन्द अर्यालले जानकारी दिए ।

उनले भने, ‘बालकले मैले नै ह्याक गरेको हो भनेर भनिसकेको छ । यसमा आफू मात्रै सलंग्न रहेको भनिरहेको छ । थप अनुसन्धान भइरहेको छ ।’

जिल्ला प्रहरी कार्यालय पर्सा प्रहरीको सहयोगमा बालकलाई नियन्त्रणमा लिएको हो । अर्यालकाअनुसार बालकलाई प्रहरी नियन्त्रणमा लिएर उक्त घटनामा को को सलंग्न छन भन्ने विषयमा अनुसन्धान गरिरहेको छ ।

कलाकार दिपाश्री निरौला र सरोज खनालले आफ्नो फेसबुक ह्याक भएको भन्दै केही समयअघि ब्यूरोमा निवेदन दिएका थिए । अभियुक्त बालकले कलाकार निरौला र खनालको फेसबुक ह्याक गरेर फेसबुकमा भएका साथीहरूसँग पैसा माग्ने गरेको थियो ।

उनलाई विद्युतीय कारोबार ऐन २०६३ बमोजिम जिल्ला अदालत काठमाडौंबाट म्याद थप गरी अनुसन्धान भइरहेको ब्यूरोले जनाएको छ ।