नेपालले पाएन ‘गडजिला भर्सेस कङ’ रिलिज अनुमति, हलिउड स्टुडियोले रोक्यो थ्रीडी संस्करण

काठमाडौं । हलिउड स्टुडियो वार्नर ब्रोजले फिल्म ‘गडजिला भर्सेस कङ’को थ्रीडी संस्करण नेपाललाई उपलब्ध नगराउँदा प्रदर्शन रोकिएको छ ।

वितरण स्रोतले नेपाल प्रेसलाई दिएको जानकारीअनुसार कारण नखुलाइकनै वार्नर ब्रोजले थ्रीडी फिल्म रोकेको हो । भारतमा भने गतसाता नै रिलिज भएको फिल्मले पहिलो साता झन्डै ३५ करोड भारु नेट कमाएको छ ।

‘प्रिन्ट तयार छैन भनेर हामीलाई फिल्म दिइएन’ स्रोतले भन्यो, ‘यसअघि दिन हुने तर, अहिले रोकिएको छ । हामी अचम्मित छौं ।’ गडजिलाको अघिल्ला प्रिक्वेल भने थ्रीडी मै नेपालमा रिलिज भएका थिए । थ्रीडी रोकिएपनि वितरकले टुडी भर्सनमै फिल्म मगाउने प्रयास थालेका छन् ।

भारतमा भने थ्रीडीमै फिल्म प्रदर्शन भैरहेको छ । कोभिड महामारीकै बीचमा यो फिल्मले त्यहाँ उधुम कमाइ गरेको हो । नेपालमा गडजिला सिरिजका प्रशस्तै दर्शक छन् ।

एडम विंगर्ड निर्देशित फिल्ममा राक्षसको राजा र विश्वको आठौं आश्चर्य नामक दुई पात्रको लडाइ चित्रण गरिएको छ । अमेरिकामा भने यो फिल्म आजदेखि रिलिज भएको छ । हलसँगै एचबीओ म्याक्समा फिल्म रिलिज हुने तयारीमा छ ।

वार्नर ब्रोज र लिजेन्ड्री एन्टरटेनमेन्टले उत्तर अमेरिकाका ३ हजार हलमा फिल्म रिलिज तयारी गरेका छन् । क्रिस्टोफर नोलनको साइन्स फिक्सन टेनेटभन्दा बढी हल गडजिलाले प्राप्त गरेको छ ।