हाम्रो समस्या पार्टीसँग हो, संसदीय दलसँग होइन : बेदुराम भुसाल

काठमाडौं । नेकपा एमाले माधव पक्षका नेता बेदुराम भुसालले आफूहरूको समस्या संसदीय दल नभई पार्टीसँग भएको बताएका छन् ।

कलंकीस्थित मेगा पार्टी प्यालेसमा शुरू भएको केन्द्रीय सदस्यहरूको बैठकमा पुगेका भुसालले संसदीय दल बैठकमा नजाने भन्ने आफूहरूको भनाइ नरहेको प्रष्ट्याए ।

उनले भने, ‘ दलको बैठकमा जाने भन्ने नै हो । जाने साथीहरू जान र नजाने साथीहरू नजान पनि सक्नु हुन्छ । संसदीय दलसँग हाम्रो समस्या होइन, पार्टीसँग हो ।’

आज ३ बजे अध्यक्ष एवं प्रधानमन्त्री केपी शर्मा ओलीले बालुवाटारमा एमाले संसदीय दलको बैठक बोलाएका छन् । एमाले संसदीय दलमा माधव नेपाल पक्षका ३५ जना सांसद छन् ।

दलको बैठक लगातार बहिष्कार गर्नु राम्रो नहुने भन्दै माधव पक्षका केही नेताले असन्तुष्टि जनाएका छन् ।

पार्टीमा गुटगत गतिविधि चलाएको आरोपमा माधव नेपालसहितका चार नेतालाई संस्थापनले सोधेको स्पष्टीकरणपछि बढेको सवालजवाफले एमाले विभाजनको संघारमा पुगेको छ ।