अन्तरसहर बुद्धिचाल प्रतियोगिता हेटौंडामा हुँदै

काठमाडौं- हेटौंडामा बुधबारदेखि सञ्चालन हुन लागेको राष्ट्रव्यापी अन्तरसहर बुद्धिचाल प्रतियोगिता २०७७ को तयारी पूरा भएको छ ।

मकवानपुर बुद्धिचाल संघ र हेटौंडा चेस क्लबको संयुक्त आयोजनामा सञ्चालन हुन लागेको प्रतियोगिताको सबै तयारी पूरा भएको हो ।

स्विस लिग प्रणालीअनुसार सात चरणसम्म सञ्चालन हुने प्रतियोगितामा नेपालका विभिन्न क्षेत्रका १८ सहरले सहभागिता जनाएको आयोजक संस्था मकवानपुर बुद्धिचाल संघले जनाएको छ ।

प्रत्येक टोलीमा चार जना नियमित खेलाडी तथा एक जना वैकल्पिक खेलाडी र एक जना व्यवस्थापक गरी ६ जनाको सहभागी रहने जनाइएको छ ।

सहभागी टोलीले अनिवार्यरूपमा महिला खेलाडी वा १६ वर्षभन्दा मुनि उमेर समूहको खेलाडी समावेश गर्नुपर्ने व्यवस्था गरिएको छ । प्रतियोगितामा महिलालाई समेत सहभागी गराइने तथा १६ वर्ष मुनिका खेलाडीलाई समावेश गराइ प्रतियोगितामा फरकपन दिने आयोजकको भनाइ छ ।

प्रतियोगिता यही चैत १४ गते शनिबारसम्म चल्ने आयोजकले जनाएको छ । प्रतियोगिताका विजेताले रु दुई लाख ५० हजार, उपविजेताले रु एक लाख ५० हजार, तेस्रो स्थान हुनेले ५० हजार तथा चौथो र पाँचौं स्थान हासिल गर्नेले क्रमशः  ३० हजार र २० हजार प्राप्त गर्ने आयोजकले जनाएको छ ।