क्यानभासमा बाल मनोविज्ञान प्रतियोगितामा सुनार प्रथम

पोखरा । ‘क्यानभााषमा बाल मनोविज्ञान’ विषयक गण्डकी प्रदेशको पोखरामा भएको विद्यालयस्तरीय चित्र प्रतियोगितामा युकेश सुनार प्रथम भएका छन् । इन्द्रेणी थिएटर पोखरा र लायन्स क्लबको संयुक्त आयोजनामा शनिबार भएको दुइ चरण प्रतियोगितामा कुमदिनी होम्स माध्यामिक विद्यालयका सुनार प्रथम भएका हुन् ।

प्रतियोगितामा हिल प्वाइन्ट माविका सपना नेपाली द्वितीय, कास्की मोर्डनाइज्ड एकेडेमीका जेसिका तिलिजा पुन तृतीय र गण्डकी बोर्डिङ स्कुलका स्वरुप माकाजुले सान्त्वना स्थान लिए । उनीहरुले क्रमशः नौ हजार, छ हजार, तीन हजार र एक हजार रुपैयाँ प्राप्त गरेका छन् ।

पहिलो चरणमा एक सय ९७ जना कलाकारले सहभागिता जनाएका थिए । उनीहरुबाट उत्कृष्ट १२ प्रतियोगीलाई दोस्रो चरणका लागि छनोट गरिएको थियो । छनोटमा परेका प्रतियोगीलाई कार्यक्रमस्थल मै चित्र बनाएका थिए । तत्स्थानमा चित्र कोरिरहँदा नै त्यसको मुल्यांकन गरी उत्कृष्ट छनोट गरिएको आयोजकले जनाएको छ । विजेताबाहेकका प्रतियोगीलाई मायाको चिनो र प्रमाणपत्र दिइएको छ ।

कार्यक्रममा कवि तथा कलाकार रमेश श्रेष्ठले विद्यालयले कलाक्षेत्रलाई प्राथमिकतामा राखेर अध्ययन, अध्यापन गराउनु प्रशंसनीय काम भएको बताए । ‘कला र शिक्षा फरक भएको र शिक्षाले भन्दा पनि बढी जिवनको ज्ञान कलाले दिनसक्छ,’ उनले भने ।

प्रतियोगितामा निर्णायकको भूमिकामा वरिष्ठ चित्रकार कृष्ण मर्सानी र मनोज तामाङ रहेका थिए । निर्णायक संयोजकसमेत रहेका मर्सानीले कलालाई निरन्तर साधना गर्न सक्ने हो भने व्यक्तित्व विकास र जीवन भोगाइमा निकै असरदार काम गर्ने बताए ।