मिस वर्ल्डको मिति र स्थान घोषणा, मिस नेपाल नम्रताले थालिन् तयारी

काठमाडौं- कोरोनाभाइरस महामारीले रोकिएको सन् २०२१ को विश्व सुन्दरी प्रतियोगिता (मिस वर्ल्ड)को मिति र स्थान घोषणा भएको छ ।

७० औं मिस वर्ल्ड आगामी डिसेम्बर १६ मा अमेरिकाको पुएर्तो रिकोमा आयोजना हुने भएको छ । मिस नेपाल आयोजक संस्था द हिडन ट्रेजरका अनुसार मिति घोषणासँगै वर्तमान मिस नेपाल नम्रता श्रेष्ठलाई तयारीका लागि प्रशस्त समय मिलेको छ ।

यसैसातादेखि नम्रताले मिस वर्ल्डका लागि तयारी सुरु गरेकी छिन् । उनी चाँडै ब्यूटी अफ पर्पसको प्रोजेक्ट र भिडियो निर्माणमा पनि सक्रिय हुने जानकारी हिडन ट्रेजरले दिएको छ । रचना शर्मा गुरुङले नम्रतालाई कोरियोग्राफी सिकाइरहेकी छिन् ।

नयाँ मिस वर्ल्डलाई गतवर्षकी विश्व सुन्दरी जमैकाकी टोनी आनसिङले ताज पहिर्‍याउनेछिन् । टोनी लकडाउनअघि नेपाल भ्रमणमा समेत आएकी थिइन् ।

आगामी डिसेम्बर छेकोमै नयाँ मिस नेपालको समेत घोषणा हुनेछ । नयाँ आउने मिस नेपालले चाहिँ सन् २०२२ को विश्व सुन्दरी प्रतियोगितामा भाग लिनेछिन् । भाइरस महामारीले गर्दा तालिका प्रभावित भएको हो ।