सरकारको ‘स’ समेत उच्चारण गरेका छैनौं : जसपा नेता कर्ण

काठमाडौं । जनता समाजवादी पार्टी (जसपा) नेपालका नेता लक्ष्मणलाल कर्णले सरकारमा सहभागी हुनेबारे पार्टीभित्र कुनै चर्चा नभएको बताएका छन् । संसद भवनमा पत्रकारहरुसँग कुराकानी गर्दै नेता कर्णले सरकारमा जान जसपाले हतार नगर्ने बताए ।

‘हामीले सरकारको स पनि उच्चारण गरेका छैनौं । विगतदेखि नै हामीले राखेका माग पूरा हुनुपर्छ भन्ने हो’, कर्णले भने ।

संविधान संशोधन, सांसद रेशम चौधरीको रिहाईलगायतका एजेण्डामा ठोस पहल नहुँदासम्म जसपाले कसैसँग सहकार्य नगर्ने कर्णको भनाइ थियो । ‘हामी यही देशका पार्टी हौं । संसदमा हाम्रो भूमिका निर्णायक छ भन्ने हामीलाई थाहा छ । अहिले हामी कसैसँग छैनौं, सबैसँग छलफलमै छौं’, कर्णले भने ।