म्यानमार ‘कू’ : सुरक्षाकर्मीको गोलीले एक नेपालीभाषीको मृत्यु

याङ्गुन- सैनिक शासनविरुद्ध म्यानमारमा भएको प्रदर्शनमा सहभागि एक नेपालीभाषीको मृत्यु भएको छ ।

४२ वर्षिय नेपालीभाषी सानोभाइ विश्वकर्माको मृत्यु भएको बीबीसीले जनाएको छ । उत्तरी म्यानमारको एक सहरमा सरकारी पक्षले पक्राउ गरेको पाँचदिनपछि उनको शव परिवारलाई बुझाइएको छ ।

पाँचदिनअघि विश्वकर्मालाई सुरक्षाकर्मीले गिरफ्तार गरेका थिए । लगत्तै प्रहरी चौकीमा पुगेर म्यानमारस्थित नेपालीले विश्वकर्माको खोजी र सोधपुछ थालेका थिए ।

सोधखोजमा विश्वकर्मालाई पक्राउ नगरिएको दाबी गरेपनि सुरक्षाकर्मीले पाँचदिनपछि शव परिवारलाई बुझाएका हुन् । उत्तरी सहर सानको मुसे सहरमा झन्डै १०० नेपालीभाषीको बसोबास छ ।

गत माघ १९ गते म्यानमार सैनिकले जननिर्वाचित सरकार अपदस्थ गरेर सत्ता आफ्नो नियन्त्रणमा लिएको थियो । चुनावमा धाँधली भएको भन्दै सेनाले म्यानमारमा सैनिक शासन लगाएको छ ।

सुनको गहना बनाउने काम गर्दै आएका मृतक विश्वकर्माका श्रीमती र पाँच छोरा छन् । मुसेमा बसोबास गर्ने नेपालीभाषीले मृतक विश्वकर्माको हिन्दू परम्पराअनुसार दाहसंस्कार गरेका छन् ।

झन्डै ५ करोड ४० लाख जनसंख्या भएको म्यानमारमा १ लाख २५ हजार हारहारीमा नेपालीभाषी भएको साझा संस्था अखिल म्यानमारदेशीय गोर्खा हिन्दू धार्मिक संघले बताउँदै आएको छ ।