मेयर कप: आर्मीविरुद्ध एपीएफको रोमाञ्चक जित

नेपाल प्रेस

२०७७ फागुन २२ गते १७:४४

काठमाडौं । सुमित महर्जनको अर्धशतक प्रेरित नेपाल एपीएफ क्लबले त्रिभुवन आर्मी क्बललाई १ विकेटले पराजित गर्दै काठमाडौं मेयर कपमा विजयी सुरुआत गरेको छ ।

त्रिवि क्रिकेट मैदानमा टस जितेर फिल्डिङ रोजेको एपीएफसामु आर्मीले २३६ रनको लक्ष्य प्रस्तुत गरेको थियो । जवाफी ब्याटिङमा उत्रिएको एपीएफले ४९.४ ओभरमा ९ विकेट गुमाएर लक्ष्य पूरा गर्‍यो ।

एपीएफका लागि सुमित महर्जनले ७८ बलमा ८ चौकासहित सर्वाधिक ६० रनको अर्धशतकीय इनिङ खेले । आठौं नम्बरमा ब्याटिङ गर्न आएका बसन्त रेग्मी १ बलले अर्धशतक बनाउन चुकेका थिए । त्यस्तै अमरसिंह रौटेलाले ३८, शंकर रानाले ३३ तथा आशिफ शेखले १२ रनबाहेक अन्य ब्याट्सम्यानले उल्लेख्य प्रदर्शन गर्न सकेनन् ।

आर्मीका लागि किफायती बलिङ गरेका बिक्रम शोबले १० ओभरमा २१ रन खर्चेर ३ मेडनसहित ३ विकेट लिए । त्यस्तै करण केसीले २ तथा सोमपाल कामी, साहब आलम र लोकेश बमले १/१ विकेट लिए ।

त्रिवि क्रिकेट मैदानमा टस हारेर ब्याटिङको निम्तो पाएको आर्मीले इनिङको अन्तिम बलमा अल आउट हुँदै २ सय ३५ रनको योगफल तयार पार्‍यो । आर्मीका लागि रोहित कुमार पौडेलले सर्वाधिक ५६ रनको योगदान गरेका थिए ।

कप्तान विनोद भणडारीसँग चौथो विकेटका लागि ७८ बलमा ७१ रनको साझेदारी गरेका थिए । विनोदले ४२ बलमा १ चोका र ३ छक्कासहित ४२, लोकेश बमले ३०, सोमपाल कामीले २८ र भीम सार्की १८ रनको योगदान गरे ।

आर्मीका अन्तिम क्रमका ब्याट्सम्यानहरू असफल रहँदा एपीएफले अन्तिम ओभरमा ४ विकेट लिएको थियो । जसमध्ये ३ विकेट अविनाश बोहराको नाममा रह्यो । एपीएफका अमरसिंह रौटेला र भुवन कार्कीले २/२ तथा बसन्त रेग्मी र कमलसिंह ऐरीले १/१ विकेट लिए ।