रुपन्देहीको उद्योगमा पनि भीषण आगलागी, पाँच दमकलले ४ घन्टामा निभाए

९ करोडको क्षति अनुमान

रुपन्देही । रुपन्देहीको शुद्धोधन गाउँपालिका वडा नं ३ बेतहीमा रहेको एभरेष्ट डोर इन्डिष्टिज तथा सदिक्षा स–मिलमा भीषण आगलागी भएको छ । आगलागीमा ९ करोडको क्षति भएको अनुमान छ ।

प्लाई, प्लाईका ढोका उत्पादन गर्ने उद्योगमा आगो लागेको हो । विद्युत् सट भएर आगलागी भएको बताइए पनि यकिन कारण भने खुलेको छैन । रुपन्देहीका ५ वटा दमकल, स्थानीय र प्रहरीको संयुक्त प्रयासमा आगलागी ४ घण्टापछि नियन्त्रणमा आएको थियो ।

उद्योगमा तयारी ढोका र प्लाइउड, कच्चादेखि दुई करोड रुपैयाँसम्म पर्ने ठूला मेसिनसमेत पूर्ण रुपमा जलेर कामै नलाग्ने भएको इन्डष्ट्रिजका प्रबन्धक रामप्रसाद खनालले बताए । उद्योगमा आगोको मुस्लो देखेपछि छिमेकीले सञ्चालकलाई खवर गरेका थिए । ३ वर्ष अगाडि १५ करोड लगानीमा उद्योग सञ्चालनमा आएको थियो । उद्योगमा १ सयभन्दा बढी मजदुरले रोजगारी पाएका छन् ।

आगलागीमा क्षति भएको उद्योग दुई महिला उद्योगी भगवती पाण्डे र गीता बस्याल सञ्चालन गरेका हुन् । उद्योग सञ्चालक सूर्यप्रसाद खनालले बजारमा पठाउन तयार भएको तयारी सामान जलेर नष्ट भएको बताए ।

आगलागीबाट कच्चा पदार्थ, तयारी सामान सवै नष्ट भएको उद्योगीको भनाइ छ । करोडौ रुपैयांको क्षति भएपनि स्थानीय तहका पदाधिकारी तथा कर्मचारी हेर्नसमेत नआएको खनालले बताए । एभरेष्ट इन्डष्ट्रिज रुपन्देहीमा ठूलो धनराशी लगानी गरी सञ्चालनमा ल्याइएको उद्योगमध्ये पर्छ ।

प्रतिक्रिया

Leave a Reply

Your email address will not be published. Required fields are marked *