राष्ट्रपतिद्वारा नातीकाजी राष्ट्रिय संगीत सम्मान प्रदान, ११ संगीतकर्मी सम्मानित

काठमाडौंँ । गायक नातिकाजी श्रेष्ठको ९४औँ स्मृती दिवसको अवसरमा नातीकाजी राष्ट्रिय संगीत सम्मान तथा पुुरस्कार प्रदान गरिएको छ ।

राष्ट्रपति कार्यलय शीतल निवासमा आयोजित कार्यक्रममा संगीतकर्मी तथा पत्रकारलाई सम्मान र पुरस्कार प्रदान गरियो ।

‘नातिकाजी राष्ट्रिय विशेष संगीत सम्मान २०७६’बाट गीतकार बालकृष्ण सजीव, सुरेन्द्र राना र चुडामणी देवकोटा, संगीतकार राजु सिँह, सुनिल मास्के, मदनसिँह नेपाली, मनोहर सुनाम, शान्तिराम राई, महेश खड्का र नारायण रायमाझी तथा वाद्यवादक राजु अग्रवाललाई सम्मानित गरियो ।

सुगम पोखरेल, चेतन सापकोटा, प्राश्ना शाक्य र गीतकार दयाराम पाण्डे ‘नातिकाजी राष्ट्रिय संगीत पुरस्कारबाट पुरस्कृत भए । प्रतिभा पुरस्कार २०७६’बाट भने गायक सुरजकुमार थापा, गीतकार हर्क साउद र गायिका मेलीना राई पुरस्कृत भए ।

संगीत संयोजक तथा वाद्य पुरस्कार वाद्यवादक जीवित जल्मी, नातिकाजी राष्ट्रिय शास्त्रीय संगीत पुरस्कार विकासनाथ योगी, राष्ट्रिय लोक संगीत पुरस्कार बद्री पंगेनी, राष्ट्रिय सम्मान नवराज केसीलाई प्रदान गरियो ।

राष्ट्रपति विद्यादेवी भण्डारी, सूचना तथा सञ्चार प्रविधि मन्त्री पार्वत गुरुङले सम्मानपत्र, नगद र खादासहित दोसल्ला ओढाएर सम्मान प्रदान गरे ।

राष्ट्रपति भण्डारीले सम्मानित तथा पुरस्कृतलाई बधाई ज्ञापन गर्दै नेपाली संगीत आकाशका उज्वल नक्षत्र भन्दै नातिकाजीको चर्चा गरिन् ।

समारोहमा संगीतकार तथा नातिकाजी स्मृति समाजका अध्यक्ष शम्भुजित बाँस्कोटाको सभापतित्वमा सम्पन्न कार्यक्रममा विभिन्न गायक गायिकाले नातिकाजीद्वारा संगीतवद्व गीत गाएका थिए ।