अविश्‍वास प्रस्ताव टेबलपछि फागुन २० सम्मलाई बैठक स्थगित

विराटनगर । सत्तापक्षीय सांसदहरूबिनै शुरू भएको बैठक फागुन २० गतेसम्मलाई स्थगित गरिएको छ ।

सभामुख प्रदीपकुमार भण्डारीले बैठक स्थगित गरी फागुन २० गते नयाँ मिति तोकिएको  सदनलाई जानकारी गराएका छन् ।

निर्धारित २ बजेको समयभन्दा झण्डै २ घण्टापछि बसेको बैठकमा प्रचण्ड-माधव पक्षका सांसद ईन्द्र आङ्बोले मुख्यमन्त्री शेरधन राईविरुद्धको अविश्‍वास प्रस्ताव पेस गरेका  थिए ।

बैठक स्थगन गर्न मागको पत्र बोकेर नेकपा प्रमुख सचेतक बुद्धिकुमार राजभण्डारी सभामुखको कार्यकक्ष पुगेका थिए ।

मुख्यमन्त्री राईले अहिलेकै अवस्थामा बैठक अघि बढ्न नसक्ने भन्दै सूचना टाँसेर स्थगित गर्न सभामुख प्रदीपकुमार भण्डारीलाई दबाब दिएपनि सभामुखले कार्यव्यवस्था परामर्श समितिको बैठकबिनै आजको सभा संचालन गरेका थिए ।

सभामुख भण्डारीले प्रक्रियाअनुसार अविश्वासको प्रस्ताव दर्ता भएर टेबल गर्ने कार्यसूची समेत तय भइसकेको भन्दै सधैँभरी बैठक रोकेर राख्न नसकिने मुख्यमन्त्रीसमक्ष जवाफ दिएको बताइएको छ ।