अस्कर विजयी विश्व चर्चित फिल्म ‘१९१७’ काठमाडौंमा रिलिज हुँदै

काठमाडौं । समीक्षकले निकै रुचाएको हलिउड फिल्म ‘१९१७’ अन्ततः काठमाडौंमा रिलिज हुने भएको छ । फिल्म हलमा नयाँ रिलिजको संकट भैरहेको बेला गतवर्षको विश्वचर्चित फिल्म नेपाली मल्टिप्लेक्समा प्रदर्शन हुने निश्चित भएको हो ।

फिल्मको नेपाल वितरक एप्पल इन्टरटेनमेन्टले रिलिज हुने कुराको पुष्टि गरेपनि मिति भने तोकेको छैन । दोस्रो विश्वयुद्धकालिन यो फिल्मले सन् २०१९ को अस्कर अवार्डमा उत्कृष्ट फिल्म र निर्देशकसहितका १० विधामा मनोनयन हासिल गरेको थियो ।

उत्कृष्ट छायांकन, भिजुअल इफेक्ट्स र ध्वनी मिश्रण विधामा यसले जित्यो । सिंगल सट्को शैलीमा खिचिएको यो फिल्मलाई स्याम मेन्डेस्ले निर्माण एवं निर्देशन गरेका हुन् । रोजर डिकन्सले यो फिल्मबाट उत्कृष्ट छायांकारको अवार्ड जितेका थिए ।

एप्पलले हलिउडको एनिमेटेड फिल्म ‘राया : द लास्ट ड्रागन’लाई पनि रिलिज गर्ने तयारी गरेको छ । शुक्रबार नेपालमा दक्षिण भारतीय फिल्म चक्रका रक्षक रिलिज भएको छ । हलिउडको मुलान, मन्स्टर हन्टर, द इन्भिजिबल म्यानसहित नेपालको कागबेनी पनि पुनः प्रदर्शनमा छ ।