विश्वको दोश्रो अग्लो ‘माउण्ट के टू’ आरोहण गर्ने टोलीलाई परिसंघले गर्‍यो सम्मान – Nepal Press

विश्वको दोश्रो अग्लो ‘माउण्ट के टू’ आरोहण गर्ने टोलीलाई परिसंघले गर्‍यो सम्मान

काठमाडौं । विश्वको दोस्रो अग्लो हिमाल ‘माउण्ट के टू’ का आरोहीलाई नेपालको निजी क्षेत्रको संस्था नेपाल उद्योग परिसंघले सम्मान गरेको छ ।
राजधानीमा शुक्रबार आयोजित औपचारिक स्वागत तथा सम्मान कार्यक्रममा परिसंघका अध्यक्ष सतिश कुमार मोर सहितको टोलीले के टू आरोही निर्मल पूर्जा र आरोहण दललाई स्वागत तथा सम्मान गरेको हो ।

कार्यक्रममा बोल्दै अध्यक्ष मोरले यो आरोहण सम्पूर्ण नेपालीको गौरवको विषय भएको बताए । उनले कार्यक्रममा आरोहीलाई स्वागत गर्दै भने

‘यहाँहरुको भ्रमण दलले मित्र राष्ट्र पाकिस्तानमा अवस्थित विश्वको दोस्रो अग्लो चुचुरो ‘के टू’ को गत जनवरी १६, २०२१ का दिन हिउँदेयामको समयमा पनि पहिलो सफल आरोहण गर्नुभएको छ । यस किर्तिमानी एवं साहसिक आरोहणबाट नेपाल र नेपालीको शिर उच्च बनाउँदै हिमालय आरोहणमा विश्व रेकर्ड कायम गर्न सफल हुनु भएकोमा बधाई दिन चाहान्छौं ।’

परिसंघका वरिष्ट उपाध्यक्ष विष्णुकुमार अग्रवालले नेपालको नाम विश्वभर स्थापित गराएकोमा आरोहण टोलीलाई बधाई दिए । उनले भने ‘आत्मविश्वास, लगाव र कठोर मेहनतले प्राप्त गरेको सफलताले नेपालको नाम विश्वभर परिचित गराउनुको साथै नेपालको नाम उच्चो बनाउनु भएको छ । यो देशकै सम्मानको कुरा हो ।’

टोलीले ३ माघमा (जनवरी १६मा) साँझ ५ बजे विश्वको दोस्रो अग्लो (८,६११ मिटर) चुचुरो के टूको सफल आरोहण गरेको थियो । १० जना नेपालीले हिउँदयाममा आरोहण गरेर विश्व किर्तिमान बनाएका थिए ।

सम्मान समारोहमा परिसंघका उपाध्यक्षहरु क्रमश अनुज अग्रवाल, राजेशकुमार अग्रवाल, सुलभ अग्रवाल र वीरेन्द्रराज पाण्डेको उपस्थिती रहेको थियो ।

प्रतिक्रिया

Leave a Reply

Your email address will not be published. Required fields are marked *

सम्बन्धित खवर
नेपाल अपडेट ट्रेन्डिङ