युएई बन्यो अन्तरिक्ष महाशक्ति, मंगल कक्षमा स्पेसक्राफ्ट अवतरण

काठमाडौं । संयुक्त अरब इमिरेट्स (युएई)को मंगल ग्रह अभियान सफल भएको छ । युएईको होप प्रोभ स्पेसक्राफ्ट गएराति रातो ग्रहको कक्षमा प्रवेश गरेको छ ।

यो सफलतासँगै युएई अर्को अन्तरिक्ष महाशक्ति बनेको छ । मंगलको कक्षमा अवतरण गरेलगत्तै होप प्रोभले पृथ्वीमा संकेत पठाएको छ । अरब मुलुकबाट पहिलोपटक युएईले मंगल मिसन थालेको हो ।

‘सफलता ! होप प्रोभसँगको सम्पर्क स्थापित भएको छ । मंगलको कक्षमा प्रवेश गर्ने योजना पुरा भएको छ’ होप मार्स मिसनले ट्वीट गर्दै यसबारे जानकारी दिएको छ ।

तीन वैज्ञानिक उपकरण जडान गरिएको होप प्रोभले कक्षमा रहेर मंगल ग्रहमा रहेर जलवायु परिवर्तनबारे अध्ययन गर्नेछ । दैनिक एवं सिजनल परिवर्तनबारे यो यानले तथ्यांक संकलन गर्ने जनाइएको छ ।

खासगरि अक्सिजन र हाइड्रोजनको उत्पति र बहाव शैलीबारे यानले अध्ययन गर्नेछ । नासाको प्रिजर्भेन्स रोभर र चीनको तियानवेन–१ मिसनसँगै अरबको यो अन्तरिक्ष यान गत जुलाइमा पृथ्वीबाट प्रक्षेपण गरिएको थियो । नासा र चीनका यान यसै महिनाभित्र अवतरण गर्ने तयारीमा छन् ।

नासाको प्रिजर्भेन्स फेब्रुअरी १८ र चीनको तियानवेन–१ फेब्रुअरी १० मा ल्यान्ड गर्ने तयारीमा छन् । युएईले आफ्नो स्पेसक्राफ्ट मंगलको कक्षमा प्रवेश गर्नुअघि अग्लो टावर बुर्ज खलिफामा लाइभ प्रसारण गरेको थियो । खुशियालीमा उक्त टाइवरमा लाइट–सो पनि गरिएको थियो ।