महिला लिगमा आर्मीविरुद्ध एपिएफ विजयी – Nepal Press

महिला लिगमा आर्मीविरुद्ध एपिएफ विजयी

काठमाडौं । सशस्त्र प्रहरी बलको एपिएफ क्लबले राष्ट्रिय महिला फुटबल लिगमा त्रिभुवन आर्मी क्लबलाई २-० गोलको नतिजामा पराजित गरेको छ ।

सातदोबाटोस्थित एन्फा कम्प्लेक्समा भएको खेलको २७औं मिनेटमा अञ्जली योञ्जनले गोल गर्दै एपिएफलाई अग्रता दिलाएकी थिइन् । सुरुआतदेखि गोलका लागि निरन्तर प्रयासरत एपिएफका लागि अञ्जलीले दायाँतर्फबाट उत्कृष्ट गोल गरेकी थिइन् ।

आर्मी गोलका लागि अगाडि बढेको फाइदा उठाउँदै एपिएफले पहिलो हाफको इन्जुरी समयमा दोस्रो गोल गर्‍यो । सावित्रा भण्डारीले बायाँतर्फबाट दिएको क्रसमा सरु लिम्बुले शानदार गोल गरिन् ।

दोस्रो हाफमा दुवै टोलीले गोलका लागि निरन्तर प्रयास गरे पनि सफल हुन नसक्दा खेल एपिएफको पक्षमा टुङ्गियो । जितसँगै उपाधि दाबेदार एपिएफले तीन खेलमा सतप्रतिशत नतिजा निकाल्दै ९ अंक जोडेको छ ।

समान खेलबाट आर्मीको ४ अंक छ । पहिलो पटक आयोजना भइरहेको महिला डबल लिगमा तीन विभागीय, एक महानगरपालिका र तीन नगरपालिका गरी सात टोली सहभागी छन् ।

प्रतिक्रिया

Leave a Reply

Your email address will not be published.