लुम्बिनीलाई केन्द्रमा राखेर पर्यटन प्रवर्द्धनको कार्यक्रम बनाउन सातै प्रदेश तयार – Nepal Press

लुम्बिनीलाई केन्द्रमा राखेर पर्यटन प्रवर्द्धनको कार्यक्रम बनाउन सातै प्रदेश तयार

रुपन्देही । लुम्बिनीको विकास र प्रवर्द्धनका लागि सातवटै प्रदेश सरकारले प्रतिवद्धता जनाएका छन् ।

तीन वर्षको कामको समीक्षा गर्न शुक्रबार लुम्बिनी प्रदेश मुकाममा जुटेका कानुनमन्त्री मन्त्री तथा सचिवहरूले शनिबार लुम्बिनीको अध्ययन भ्रमणपश्चात यस्तो प्रतिवद्धता गरेका हुन् । सातै प्रदेशका आन्तरिक मामिला तथा कानुन मन्त्री, मन्त्रालयका सचिव तथा महान्यायाधीवक्ताहरुलाई लुम्बिनी विकास कोषका कोषाध्यक्ष सुरेन्द्रमणि शाक्यले स्वागत गर्दै बुद्ध जन्मस्थल लुम्बिनीको बारेमा जानकारी गराए ।

आन्तरिक मामिला तथा कानुनमन्त्रीहरू लुम्बिनीका कुलप्रसाद के.सी, गण्डकीका हरिबहादुर चुमान, प्रदेश १ का हिक्मतकुमार कार्की, कर्णालीका नरेश भण्डारीले सहकार्य र एकताको प्रतिबद्धता ब्यक्त गरेका छन् ।

कार्यक्रममा सहभागी भएका प्रदेश मन्त्री र सचिवहरूले संघीय सरकार मातहत रहेको लुम्बिनीको विकास र उत्थानका लागि प्रदेश सरकारहरू सहकार्य गरेर अगाडि बढ्ने बताएका छन् । उनीहरुले लुम्बिनीलाई केन्द्रमा राखेर सातै प्रदेशका पर्यटकीय क्षेत्रको विकास गर्नेगरी कार्यक्रमसमेत बनाउन तयार रहेको जानकारी गराए ।

लुम्बिनी विकास कोषका सूचना तथा जनसम्पर्क प्रमुख डा. हरिध्वज राईले लुम्बिनी गुरुयोजना र बुद्धिज्मको बारेमा जानकारी दिए । प्रदेशका मन्त्री, सचिव र महान्याधिवक्ताहरुले अध्ययन अवलोकन भ्रमण गरेको कोषका वरिष्ठ प्रशासकीय अधिकृत ज्ञानिन राईले बताए ।

प्रतिक्रिया

Leave a Reply

Your email address will not be published.