सुवास नेम्वाङको टोली निर्वाचन आयोगमा, चुनावी तयारी तीव्र बनाउन आग्रह

काठमाडौं । केपी ओली नेतृत्वको नेकपाले निर्वाचन आयोगलाई चुनावको तयारी नरोक्न र तदारुकताका साथ लाग्न आग्रह गरेको छ ।

नेकपा नेता सुवास नेम्वाङ सहितको टोलीले बुधवार आयोगका पदाधिकराीलाई भेटेर चुनाव तोकिएकै समयमा सम्पन्न गर्ने प्रक्रिया अघि बढाउन आग्रह गरेको हो ।

निर्वाचन आयोगले पार्टीको आधिकारिकताका सन्दर्भमा पठाएको पत्रको लिखित जवाफ बोकेर आयोग पुगेका नेताहरुले पार्टी अध्यक्ष ओली र महासचिव बिष्णु पौडेल रहेको पार्टीनै आधिकारिक भएकाले अन्यौलमा नरहन आग्रह गरेका छन् ।

आयोगबाट फर्केपछि नेपालप्रेससँग कुरा गर्दै नेम्वाङले भने–हामीले आफ्नो जवाफ दिएका छौं र पार्टीको आधिकारिकता केपी ओली रहेको ठाउँमै हुन्छ यसमा कुनै समस्या छैन । बरु हामीले निर्वाचनको तयारी तीब्रताका साथ अघि बढाउन आयोगलाई आग्रह गरेका छौं ।

प्रचण्ड र माधव नेपाल आफैं गएर आयोगलाई चुनाव सम्बन्धी कुनै पनि प्रक्रिया अघि नबढाउन आग्रह गरेपछि ओली पक्षले चुनावी तयारी तदारुकतासाथ लैजान आग्रह गरेको हो ।

सर्वोच्च अदालतले अन्तरिम आदेश नदिएको र चुनावको तयारी रोक्न नभनेकाले आयोग कानुन बमोजिम चल्ने नेम्वाङले बताए । आयोगले कानुन बमोजिम नै आयोगले निर्वाचनका कामहरु अघि बढाइरहेको जानकारी दिएका थिए ।

प्रचण्ड माधव पक्षले सर्वोच्चअदालतमा मुद्दा लम्ब्याउने र निर्वाचन आयोगलाई चुनावको कार्यक्रम रोक्न दबाब दिने तिकडम अपनाएर देशलाई संवैधानिक संकटतर्फ लैजान खोजेको आरोप अ‍ोली पक्षले लगाएको छ ।