९ जना डीआईजीलाई दर्ज्यानी चिन्ह प्रदान, ९ जनाकै संघीय निकायमा पदस्थापना – Nepal Press

९ जना डीआईजीलाई दर्ज्यानी चिन्ह प्रदान, ९ जनाकै संघीय निकायमा पदस्थापना

काठमाडौं । प्रहरी वरिष्ठ उपरीक्षक एसएसपीबाट प्रहरी नायव महानिरीक्षक डीआईजी पदमा बढुवा भएका ९ जना वरिष्ठ प्रहरी अधिकृतलाई प्रहरी महानिरीक्षक आईजीपी शैलेश थापाले दर्ज्यानी चिन्ह प्रदान गरेका छन् ।

प्रहरी प्रधान कार्यालयमा आज बिहीबार आयोजित एक समारोहकाबीच उनीहरुलाई दर्ज्यानी चिन्ह प्रदान गरिएको हो । दर्ज्यानी चिन्ह पाउनेमा प्रहरी नायव महानिरीक्षक गणेशबहादुर ऐर, पुरुषोत्तम कँडेल, राजेशकुमार लाल कर्ण, डा. देवबहादुर बोहरा, दिवेश लोहनी, राम कृपाल साह, उमेश रन्जितकार, प्रकाश अधिकारी र मुकुन्दराज आचार्य रहेका छन् । समारोहमा प्रहरी महानिरीक्षक थापाले पदोन्नति भएका प्रहरी नायव महानिरीक्षकलाई बधाई दिंदै पदोन्नतिसँगै नेतृत्वदायी आचरण पनि फेरिनुपर्ने र प्राप्त जिम्मेवारीलाई नयाँ उर्जाका साथ निर्वाह गर्न निर्देशन पनि दिएका छन् ।

उक्त अवसरमा पदोन्नति भएका प्रहरी अधिकृतको तर्फबाट मन्तव्य व्यक्त गर्दै प्रहरी नायव महानिरीक्षक पुरुषोत्तम कँडेलले प्रचलित कानून र संगठनको नीति निर्देशन अनुसार काम गर्ने प्रतिबद्धता जनाएका छन् । समारोहमा प्रहरी अतिरिक्त महानिरीक्षक, प्रहरी नायव महानिरीक्षक, वरिष्ठ प्रहरी अधिकृतलगायत प्रहरी अधिकृत तथा प्रहरी जवानको सहभागिता रहेको थियो । पुस २२ गते गृहमन्त्री स्तरीय निर्णयअनुसार ९ जना एसएसपीको डीआईजीमा बढुवा भएको थियो ।

बढुवा भएका ९ जनालाई विभिन्न निकायमा पदस्थापना गरिएको केन्द्रीय प्रहरी प्रवक्ता एवम सूचना अधिकारी एसएसपी वसन्तबहादुर कुँवरले नेपाल प्रेसलाई जानकारी दिए । प्रवक्ता कुँवरका अनुसार प्रकाश अधिकारीलाई प्रहरी महानिरीक्षकको सचिवालयमा, मुकुन्दराज आचार्यलाई योजना तथा विकास निर्देशनालयमा, उमेश रञ्जितकारलाई महानगरीय प्रहरी कार्यालयमा डाक्टर देवबहादुर बोहोरालाई राष्ट्रिय प्रहरी प्रशिक्षण प्रतिष्ठानमा, पुरुषोत्तम कँडेललाई प्रबन्ध निर्देशनालयमा, कार्य निर्देशनालयमा राजेशकुमार लाल कर्ण, साइवर व्यूरोमा रामकृपाल शाह र अन्य डीआईजीको पनि संघमा रहेका विभिन्न निकायमा पदस्थापना गरिएको छ ।

प्रतिक्रिया

Leave a Reply

Your email address will not be published.