पदभार ग्रहण गर्दै खेलकुदमन्त्री लामाले भने– खेलकुद बुझ्दिनँ, सल्लाह गरेर अघि बढ्छु

काठमाडौं । प्रतिनिधिसभा विघटनपछि पुनर्गठन भएको मन्त्रीमन्डलमा युवा तथा खेलकुद मन्त्रालयको जिम्मेवारी पाएका दावा लामाले आइतबार पदभार ग्रहण गरेका छन् ।

सिंहदरबारस्थित युवा तथा खेलकुद मन्त्रालयमा नवनियुक्त मन्त्री लामाले पदभार ग्रहण गर्दै खेल क्षेत्रका विज्ञ र खेल क्षेत्रमा जीवन बिताएका खेलाडीसँग परामर्श गरेर अघि बढ्ने बताए । उनले खेलकुद क्षेत्रमा परिणाममुखी योजनाका साथ काम गर्ने प्रतिबद्धता पनि व्यक्त गरे ।

यसअघिका खेलकुदमन्त्री जगतबहादुर विश्वकर्मा आजै मन्त्रालयबाट विदा भएका छन् । पूर्वमन्त्री विश्वकर्मालाई मन्त्रालयका सचिव रामप्रसाद थपलिया, राखेपका सदस्यसचिव रमेश सिलवाल, उपाध्यक्ष शिव कोइराला लगायतले बिदाइ गरेका हुन् ।

नवनियुक्त मन्त्री लामालाई स्वागत गर्न आयोजित कार्यक्रममा मन्त्रालयका सचिव रामप्रसाद थपलियाले मन्त्रालयले गरेका र गर्ने क्रममा रहेका गतिविधिबारेमा नवनियुक्त मन्त्रीलाई ब्रिफिङ गरेका थिए ।