नेकपाका कार्यालय र सम्पत्तिमा प्रचण्ड–माधव समूहको दाबी

काठमाडौं । विभाजित नेकपाको प्रचण्ड–माधव नेपाल पक्षले एकीकृत पार्टीका पार्टी कार्यालय र सम्पत्तिमा आफ्नो हक दाबी गरेको छ ।

शुक्रबार आयोजित पत्रकार सम्मेलनमा अर्का अध्यक्ष माधव नेपालले आफूहरु नै आधिकारिक पार्टी भएकाले पार्टीको सम्पत्ति र देशभरका पार्टी कार्यालयहरु आफ्नो समूहको हुने बताए । उनले भने–विभिन्न क्लब, प्रालि र फाउण्डेशनहरुका सम्पत्तिमा हामी दाबी गर्दैनौं तर नेकपाको नामका सम्पत्ति र कार्यालय हाम्रा हुन् ।

प्रधानमन्त्री तथा अर्को नेकपाका अध्यक्ष केपी शर्मा ओलीले आफू नै नेकपाको वैधानिक र पहिलो अध्यक्ष रहेको भन्दै पार्टीका सबै कार्यालय र सम्पत्ति प्रचण्ड–माधव नेपाल समूहको दाबी नलाग्ने बताएका थिए ।

आफूहरुले पेरिसडाँडामा दाबी नगर्ने भन्दै तत्कालीन एमालेका कार्यालय र सम्पत्ति आफ्नै नेतृत्वको पार्टीको हुने ओलीको भनाइ थियो ।