मन्त्रिपरिषद बैठक साँझ बस्ने, प्रदेशसभाबारे प्रधानमन्त्रीको कदम कस्तो होला ?

काठमाडौं । नेकपा विभाजनपछि आज साँझ मन्त्रिपरिषदको बैठक पहिलोपटक बस्दैछ । पुस ५ गतेको मन्त्रिपरिषद बैठकबाट प्रतिनिधिसभा विघटनको सिफारिस गरेपछि यसबीचमा अर्को बैठक बसेको छैन ।

सोही दिन प्रतिनिधिसभा विघटनप्रति असहमति जनाउँदै प्रचण्ड–माधव नेपाल पक्षका सात जना मन्त्रीले राजीनामा दिएका थिए ।

प्रायः सोमवार र विहीवार मन्त्रिपरिषदको नियमित बैठक बस्ने गरे पनि आज शुक्रवार साँझ ६ बजे बैठक बस्दैछ । कतिपयले आजको बैठकबाट प्रदेशसभा विघटनको सिफारिस हुनसक्ने आकलन समेत गरेका छन् ।

प्रदेश सरकारहरुलाई अस्थिर बनाउन अविश्वास प्रस्ताव ल्याइए आफूले अझ कडा कदम चाल्नुपर्ने चेतावनी प्रधानमन्त्रीले दिइसकेका छन् । संविधान बमोजिम राष्ट्रपतिबाट प्रदेशसभा भंग गर्न सकिन्छ ।

त्यसको अनुमोदन संघीय संसदबाट ३५ दिनभित्र गर्नुपर्छ भने ६ महिनाभित्र निर्वाचन गर्नुपर्छ । आजै वागमती प्रदेशका मुख्यमन्त्री डोरमणि पौडेलविरुद्ध प्रचण्ड माधव नेपाल पक्षले अविश्वास प्रस्ताव दर्ता गरिसकेको छ ।